IA: Aalisarnermut inatsisissaq inuiaqatigiinnut akeqartinneqassanngilaq

Inuit Ataqatigiit aalisarnermut oqaaseqartartua, Hans Aronsen, aalisarnermut inatsisissamut siunnersuutip assortuussutaasup, amerlasuut inatsimmut tusarniaanermi aarlerisaaruteqarfigisimasaata siullermeerneqarnerani taama naqissusiivoq.

Kingunissaanik misissuinerit
- Aningaasaqarnikkut kingunissai misissoqqissaarneqassapput, IA-mi oqaaseqartartoq naqissusiivoq, taassuma ''aalisarnerup iluani naligiinnginnerup annertusiartortoq'' iliuuseqarfigineqassasoq naqissuserpaa.

- Kissaatingaarput aalisarnermik inuussutissarsiut nunatta aningaasaqarneranut taamak pingaaruteqartigisoq peqqissaartumik aalajangernissamut tunngavissanik misissuilluarsimanikkut qulaajaavigineqaqqaassasoq. Taamatullu sulisoqassappat Inatsisartut ataatsimiititaliaasa piffissaqarlutik aamma peqqissaartumik sulisinnaanissaat qulakkeerumallugit tuaviuussaanngitsumik sulinissaannut periarfissalerneqartariaqarput, IA-mi oqaaseqartartoq oqarpoq, aalisarnermik inuussutissarsiortut soqutigisaqartut tamarmik taassuma suliap nanginneqarnerani ilanngunneqarnissaat pingaartippaa.

Siumup oqaaseqartartua, Nikkulaat Jeremiassen, oqaaseqarnermi kingorna apeqquteqarfigineqarluarpoq – Demokraatinit partiimit illuatungiliuttuinnarmiunngitsoq aamma attaviitsumit Michael Risingimit, kisianni aamma naalakkersuisoqataasunit IA-mit, tassani Aaja Chemnitz Larsen aamma Aqqaluaq B. Egede isornartorsiortunik apeqquteqarput, inatsisip atuutilerneqarnerani inuiaqatigiinnut aningaasanik akeqartinnissaa pinngitsoorneqassanersoq apeqqutigineqarluni.

Siumut: Ikitsuinnaat ullumikkut iluaqutserneqartarput
Ikitsuinnarnut iluaqutsiinngitsumik aaqqiissuteqartoqarnissaa pisariaqartoq, Siumup oqaaseqartartua isumaqarpoq.

- Inuusuttortatsinnut aalisarnermi maligassiuisunik amigaateqarpugut, Nikkulaat Jeremiassen oqarpoq, inatsisissamut tunngatillugu oqallinneq ''illuinnaasiorpallaartutut annaasaqartussanullu tunngavallaartoq'' isumaqarpoq.

- Illuinnaasiortumillu nalilersuisoqarsimanera pissusissamisuunngilaq, Nukkulaat Jeremiassen oqarpoq, inuiaqatigiit pisuussutaat amerlanerusut iluaqutigissagaat pingaarnerusoq oqaatigalugu.

Amerlanerusut inuussutissarsiornermut ilanngutissapput
- Ullumikkut isiginnaaginnartariaqartunik peqarpoq. Taakku namminiilivinnissamut kivissinnaanngilaatigut. Aalisarnermik inuussutissarsiornermut ilanngutsittariaqarpagut, Siumup oqaaseqartartua naqissusiivoq, taanna aningaasatigut inuiaqatigiinnut kingunissaanik apeqquteqartoqarneranut akissuteqanngilaq.

Aalisarnermut inatsit politikkikkut siammasissumik tapersersorneqarluni akuerineqassasoq, Aaja Chemnitz Larsenip naqissuserpaa, aalisarnermut inuussutissarsiorneq nunap avammut niuernerani annertunerpaanera pissutigalugu.

Demokraatit: Eqqoriaanernik tunngaveqartoq
Demokraatineersoq aalisarnermut ataatsimiititaliami ilaasortaasimasoq, Nivi Olsen, aalisarnermut inatsimmik suliarilluakkamik aamma naatsorsorluagaasumik kingunissaanik misissorneqarluarsimasumik ujartuivoq.

- Kalaallit Nunaata pisariaqartinngilai misileraanissat aamma inatsisit politikerit arlaasa eqqoriaanerat tunngaviinnarlugu sanaat, Nivi Olsen oqarpoq, Naalakkersuisut aamma Aalisarnermut Naalakkersuisoq ''tusarnaarumanngilluinnartoq taamaallaallu upperisaqartoq kukkusinnaannginnerminik taamaattumik takusinnaanngilaa qanoq pisoqassanersoq inatsit akuersissutigineqassappat. Ulorianarluinnaqqissaartoq atuallalerparput.''

Demokraatit oqaaseqartartuata kissaatit arlallit tusarniaanermi akissutini oqaatigineqartut qaqippai. Tassanilu ingammik kingunissaanik naatsorsuutit ujartorneqarput.

Ajornartorsiut qitiusoq
- Naatsorsuinerit aamma kingunissanik misissuinerit amigaatigineqartut siunnersuummi ajornartorsiutip qiteraa, Nivi Olsen naqissusiivoq, nunap aalisarnermut politikkiani allannguisoqarnissaanut Demokraatit isumaqataasut taanna ilisimatitsivoq.

Aalisarnermut inatsit pillugu allaaserisat uani takukkit