IA: Aalajangiineq nikallornartuuvoq naalagaaniarpalaartuullunilu

Venstremit Marcus Knuth Folketingimi Kalaallit Nunaannut ataatsimiititaliaani siulittaasussatut toqqarneqarsimanera Sermitsiaq.AG-mit allaaserineqareerpoq.

Ataatsimiititaliami ukiuni kingullerni 20-ni kalaallimit siulittaasuuffigineqartarpoq, tamannalu allanngortinneqarpoq.

IA pakatsivoq
Taamatut aalajangiisoqarnera Inuit Ataqatigiinnit Aaja Chemnitz Larsenip pakatsissutigaa.

- Inissisimaffiup taassuma, Folketingimi ilaasortamut Danmarkimeersumut allaallu politikeritut misilittagaqanngitsumut, tunniunneqarnerata takutippaa, Kalaallit Nunaat kalaallillu namminneq qinersinerat qanoq ataqqineqanngitsigisut, Aaja Chemnitz Larsen oqarpoq.

- Uagut nammineq ataatsimiititaliami siulittaasutut inissinneqannginnerput, taamaalillutalu Kalaallit Nunaannut ataatsimiititaliami Nunatsinni pissutsit suut oqallisigineqarnissaannik toqqaannartumik aalajangiisinnaannginnerput, tassaavoq qinersisartunut kalaallinut nalunaarut nikallornartoq naalagaaniarpalaartorlu. Maanna tamakku isumagineqartalissapput danskit Folketingimut ilaasortaatitaannit Kalaallit Nunaanni pissutsinik ilisimasaqanngitsumit.

Nunarput nuannaraa
- Ataatsimiititaliami siulittaasunngornera nuannaarutigeqaara, Venstremeersoq Marcus Knuth pingasunngormat oqarpoq.

Kalaallit Nunaannut politikkikkut misilittagaqanngilaq, kisianni angaa Eigil Knuth Kalaallit Nunaanni ukiorpassuarni ilisimasassarsiortooreerpoq.

- Kalaallit Nunaat Danmarkilu ataqatigiinnerulernissaat sulissutigineqartariaqarpoq, aamma danskit Kalaallit Nunaannut ilisimasaqarnerulernissaat sulissutigineqartariaqarpoq, politikkeri oqarpoq. Soorunami Kalaallit Nunaanneereerpunga, takoqqinnissaa aamma qilanaaraara, Marcus Knuth oqarpoq.

Ataatsimiititaliami Kalaallit Nunaanneersumik siulittaasoqarnissaa Inuit Ataqatigiinnit Siumumiillu anguniarneqarsimagaluartoq taamaasilluni iluatsinngitsoorpoq.

Venstre aamma isumaqatiginninniarfigineqarsimasoq Inuit Ataqatigiinnit nalunaarutigineqarpoq.

- Venstre-niit piumasaqaat tassaavoq, Danmarkip iluani pissutsit taasissutigineqassatillugit Inuit Ataqatigiit taaseqataasannginnissaat. Inuit Ataqatigiit toqqarpaat partiip Folketingimi kiffaanngissuseqarluni taasisinnaatitaanera pilliutiginiarnagu, taasissutissat nunap iluani nunalluunniit avataani pissutsinut tunngangaluarpataluunniit, Aaja Chemnitz Larsen nassuiaavoq.

Siumut eqqorneqassava?
- Aaja Chemnitz Larsen, qineqqusaarnermi Inuit Ataqatigiinnit oqariartuutigineqarpoq siumoortumik suleqatissanik taaserusunnatik, nalunnginneqaraluarpormi Inuit Ataqatigiit saamerliuniartuusoq. Tamanna ataatsimiititaliamut siulittaasuutitaqannginnermut pilliutaaginnanngila - aamma Siumut tassunga eqqugaanngila naak tassunga attuumassuteqanngikkaluartut?

- Inuit Ataqatigiinnit qineqqusaarnermi anguniarparput ilaatigut Venstremik oqaloqateqarsinnaaneq, taamaasilluta siumut kikkut suleqatigissanerlugit taasereernata. Kisianni oqartussaaffinnik annaasaqarusunnginnerput aamma ersersipparput.

- Siumut Inuit Ataqatigiillu ataatsimiititaliami siulittaasuunissaat anguniarsimagaluarlugu oqarputit, tamanna isumaqatigiissutaasimanngimmat allamik siulittaasumik toqqaasoqarpa?

- Siumut tassunga ugguaateqassappat Socialdemokratinut qiviartariaqarput. Amerlanerussuteqartut aalajangigaat Siumumit ataqqineqarpoq, taamaasillunilu ataatsimiititaliami siulittaasuuffeqarnissaq neriuutigisimanngilaat, Aaja Chemnitz Larsen akivoq.

Amerlanerussuteqartut aalajangigaat
Folketingimi amerlanerussuteqartut aalajangigaat Siumumit Aleqa Hammondimit ataqqineqartoq oqarpoq:

- Amerlanerussuteqartut aalajangigaat ataqqivarput. Kisianni Kalaallit Nunaannut ataatsimiititaliami kalaallimik siulittaasunngortitsisoqannginnera uggornarpoq.

Aleqa Hammond ataatsimiititaliami siulittaasup tulliatut inissinneqarpoq. Tamanna Socialdemokratinit innersuunneqarpoq.

Inuit Ataqatigiinnit Aaja Chemnitz Larsen ataatsimiititaliami ilaasortaassaaq.

Aleqa Hammondip Sermitsiaq.AG-mit apersorneqarnera aamma allaaserineqassaaq.