Hvidbjørnenip kilisaat silapilussiortoq ikiorpaa
Umiarsuup nakkutilliisartup Hvidbjørnenip kilisaat Polar Aassik motooriminik unittoormat talittarfiup tungaanut kalippaa.
Kilisaat Polar Aassik arfineq-pingasunik inuttaqarluni sapaatip akunnerani siuliani sisamanngornermi Kujataani Ikerasassuarmit kangianut 40 sømilitut ungasitsigisumiitilluni motooriminik unittoorpoq.
Sumiiffimmi anorersuarnissaanik aarlerisaartoqarmat umiarsuaq nakkutilliissut Hvidbjørnen aallartinneqarpoq, Issittumi Sakkutooqarfik nittartakkamini allappoq.
Umiarsuaq nakkutilliiartortoq tallimanngornermi ullaakkut tikiuppoq. Anorili 30 m/s-itut sakkortutigaaq mallillu 10 miiterisut portutigalutik, taamaammat pituutarsuarmik kilisaammukaassinissaq ulorianarpallaarsimalluni.
- Taamaammat Hvidbjørnen kilisaatip eqqaaniiginnarpoq, avannernernilu umiarsuaq kujammut Kap Farvel kujaqqullugu tissukartoq ingiaqatigiinnarlugu. Ullut marluk anorersuarpoq, malissuaqarluni erseqqarlullunilu, Issittumi Sakkutooqarfik nittartakkamini nassuiaavoq.
Sapaammi anori sakkukinnerulersimavoq, kilisaammullu pituutarsuaq miloriunneqarsinnaalersimalluni. Taamaasilluni kilisaat Qaqortumut kalinneqarluni. Tassanili ajornartorsiutit kipinngillat.
- Pituutaq kaligutigineqartoq ataasinngornermi kittorarpoq, umiarsuarlu nakkutilliiartortitaq nutaamik pituttuileruttorpoq, allassimavoq.
Hvidbjørnen aamma Polar Aassik Qaqortumut aqagu tikinnissaat naatsorsuutigineqarpoq.