Hus Forbi-mik tuniniaasartoq sakkortuumik isummersortarpoq

Gerth Gedionsen Aasiammiuuvoq ukiunilu 24-ni Danmarkimi najugaqarsimalluni. Ukiut siulliit 16-it Københavnimiissimavoq. Ukiut 24-t oqitsuinnaasimanngillat. Angerlarsimaffeqanngitsut immikkoortitallu amerlasuut assigalugit Gerth Gedionsenip Hus Forbi annassutigisimavaa.

- Peqatigiiffinni Hus Forbi kisartaalluni uannut ajunngitsuliortuarsimavoq, Gerth Gedionsen Sermitsiaq.AG-p oqaloqatiginerani oqaluttuarpoq nangillunilu:

- Peqatigiiffik Hus Forbi sunut tamanut atorsimavaanga. Tuniniaasutut, tuniniaasartutut, siulersuisuni ilaasortatut aammalu sapaatip akunneri arlaqanngitsut matuma siorna Rasmus Lyberth pillugu allaaserinneqataavunga. Allaaserisaq nersualaarneqangaatsiarsimavoq.

Gerth aamma Lukas Graham

Gerth Gedionsenip nuannaarutigeqalugu oqaluttuaraa Lukas Grahamip saqqummersitseqatigisimanera, taanna Hus Forbimit saqqummersinneqaqqammerpoq.

- Erinarsoqatigiinni ilaavunga assimilu Lukas Grahamip saniani nikorfallunga, Gerth Gedionsen oqaluttuarpoq.

Gerth Gedionsenip immikkoortitaalluni angalarsimafeqanngitsuulluniluunniit inuuniarnerup artornarsinnaanera isertuutinngilaa.

- Inuttut ilaanni nakkangasinnaasarpugut. Tamanna kikkunnulluunniit eqquisinnaavoq. Hus Forbi-mik tuniniaasut arlallit ilinnigaqarluarsimasuupput atorfigissaartuusimallutillu. Kalaalliuvunga qularutiginngilluinnarparalu inuiaqatigiinni allersaangatta.

Annertunerusumik iliuseqarneq

Gerth Gedionsen siornatigut immikkoortitaaneq angerlarsimaffeqanngitsuunerlu pillugu Odensimi Kalaallit Illuanni Cafe Allumi oqalugiaateqarsimavoq. Ukiumi nutaami Gerth Gedionsen Kalaallit Illuanni oqaluttuaqqissaaq.

- Suliassarpassuaqarpoq qanoq iliuseqarnissaq pillugu oqariartuuteqartunik. Taamaakkaluartoq angerlarsimaffeqanngitsut amerlatsikkaluttuinnarput aammalu inuusuttuaqarpoq ajornartorsiutilinnik amerlasuullu ingerlatseriaatsimut tunniutiinnarsimapput, Gerth Gedionsen oqarpoq.

- Inuit suliuteqarfigisassaapput. Tamaani Danmarkimi kalaallinik angerlarusuttoqassatillugu aningaasanik ikiorserneqarsinnaangaluarput. Taamaaliornikkut Kalaallit Nunaanni nutaamik aallartittoqarsinnaavoq. Assersuutigalugu inuit Afghanistaniminngaanneersut angerlarnissaannik ikiorsinnaagaanni kalaallit aamma ikiorsinnaasariaqarput.

- Aningaasat amerlanngitsut atorlugit Danmarkimi kalaallisut oqaasilinnut radiomik pilersitsisoqarsinnaavoq. Taanna tusagassiortumik ataatsimit kajumissutsiminillu suliaqartartunit ingerlanneqarsinnaavoq. Ilinniagaqarsimanngitsut nukittorsaavigineqassapput taamaasiornikkut inuit ataasiakkaat aqutseriaatsimit nakkannginnerini ikiorneqartalissapput.

Inuuneq artornartoq

Inuit Kalaallit Nunaanniit Danmarkimi inuuniarneq annertuumik ilisimasaqarfiginngikkaluarlugu Danmarkimut nuuttarmata Gerth Gedionsenip paasisinnaalluarpaa. Taakku isumaginninnikkut ajornartorsiutit qatsulluinnarsimasarpaat. Imaassinnaavoq inissaaleqisut. Ukumininnguit taaneqarsinnaapput: Danmarkimi inuuniarneq akikinneruvoq. Peqqinnissaqarfik pitsaaneruvoq. Utoqqalinersiat amerlanerupput nerisassallu akikinnerullutik, Gerth Gedionsenip tikkuagaasa ilagaat.

- Qulaaniik ingerlatsineq soorlu Kalaallit Nunaanni taamaattoqartoq paasisinnaanngilluinnarpara, Gerth Gedionsen erseqqissaavoq.

Imigassaq ulorianartoq

Gerth Gedionsenip ukiut ingerlanerini imerajuttuusimanini isertuutinngilluinnarpaa.

- Qujanartumik imigassaq aqussinnaalersimavara. Arlaleriarlunga unitsinnikuuara. Maanna uanga imigassaq aquppara imigassap aqunngilaanga, Gerth Gedionsen naqissusiivoq.

Mianersorit

Gerth Gedionsenip oqaloqatigiinnitsinni isertuutinngilaa, Danmarkimi ajunngitsorpassuaqarsinnaangaluartoq Danmarkimut nuunnissaq eqqarsaatigeqqissaarneqartassasoq.

- Danmarkimi inuuneq assut kiserliorfiusinnaavoq. Ilaqutaqarneq pingaarnerpaavoq, taamaammat ilaquttat qimalinnginnerini eqqarsarluaqqaartariaqarpoq, Gerth Gedionsen oqaloqatigiinnitsinni erseqqissaavoq.

Hus Forbi pillugu

Aviisinik tuniniaaneq annertunngitsumik isertitsissutigineqartarpoq. Tuniniaasunik ilisarnaasiisarpoq. Sullisit ukiuuneranut naleqquttut tunniunneqartarput minnerunngitsumillu ataatsimooqatigiinnermik pilersitsisarluni.

Odensimi tuniniaasut 100-jut missaanniipput Danmarkimilu katillugu 2.200-ut missaanniillutik. Gerth Gedionsenip kalaallit tuniniaasut allat peqatigalugit piniarfissuup saavani nikerarlutik tuniniaasarput.

Hus Forbi 20 koruuninik akeqarpoq koruunillu arfineq-pingasut tuniniaasumut nakkartinneqartarlutik. Hus Forbi tuniniaasartuisa ukiup naajartornerani qaammatisiutinik tuniniaasarput, sinneqartoorutillu soorunami angerlarsimaffeqanngitsunut tutsinneqartarput.

Angerlarsimaffeqanngitsut erseqqissumik kisitsisaatigineqanngillat, taamaakkaluartoq Danmarkimi angerlarsimaffeqanngitsut ikinnerpaamik 6.600-juussangatinneqarput taakkunannga 660-it aqqusinermi sinittartuullutik.