Hurtigruten: Ilulissat illoqarfik tupinnarluinnartuuvoq

Nuummi aamma Ilulissani mittarfissuassanut marlunnut Inatsisartut akuersissuteqassagaluarpata, Hurtigrutenip ilaatigut akunnittarfinnik annertuumik aningaasaliissuteqarnissaanut, illoqarfiit taakku marluk qilanaalereersinnaapput.

Hurtigruten ukiut marluk qaangiuppata nunarsuaq tamakkerlugu inunnit ilaasoqarluni nunatta Kalaallit Nunaata sineriaani tekonologi mingutsitsinngitsoq atorlugu angalasalerniarpoq. Tassungali killinngilaq. Umiarsuaatileqatigiiffik ukiuni tulliuttuni ingerlatseqatigiiffimmut ineriartortitsilluni 5,5 milliardinik aningaasaliiniartoq, Kalaallit Nunaanni illoqarfinni marlunni, tassa Nuummi aamma Ilulissani annertuumik pilersaaruteqarlunilu isumaliutersuuteqarpoq.

Hurtigrutenimi pisortaanerup Thomas Westergaardip Kalaallit Nunaanni takornariarnikkut aningaasaliinissamut aamma iluanaarnissamut periarfissat qiimmatsaatigineri isertuutinngilai.

Taanna siullermik pingasunik kisitsisitalimmik millionilikkaanik Hurtigrutenip Nuummi aninigaasaliissuteqarnissaanut qilanaarpoq. Ilaatigut akunnittarfimmut nutaamut. Ilulissat Kalaallit Nunaanni sumiiffinni akunnittarfiliortitsinikkut aningaasaliiffigisassat aappaattut, Thomas Westergaardip takorluugaraa. Takorluugarlu piviusunngortinneqarsinnaavoq, taanna isumaqarpoq.

- Ilulissat illoqarfik tupinnarluinnartuuvoq, pisortaq Sermitsiaq.AG-mit apersorneqarnermini naqissusiivoq.

Umiarsuaq hybridiusoq

MS Fridtjof Nansen nunarsuarmi umiarsuit takornariartaatit hybridimik ingerlatillit siulliit marluk aapparissavaat, taakku immikkut 530-nik ilaasoqarsinnaassapput, Norgemilu umiarsuaatileqatigiiffiup maanna sanaartortippai.

Aasaanerani 2020-mi Fridjof Nansen siullermeerluni Kalaallit Nunaata sineriaatigut angalassaaq. Taanna umiarsuullu aappaa immikkut sanatitanik atortorissaaruteqassaaq, soorlu qaannat, dronet immap iluatigoortartut aamma ‘’angallatit takornariartaatit ilaasunik nunamt sumulluunniit niusisinnaasut.’’

Siunnersuisarfimmit Menon Economicsimit misissuinerit naapertorlugit Hurtigrutenip suliffeqarfia suliffinnik tuusintilikkaanik arlalinnik pilersitsissaaq, Norgellu sineriaani norskit koruuniinik milliardinik arlalinnik naleqalersitsissaaq.

Issittumi nittartakkakkut nutaarsiassaqartitsiviup paasisimasaqarluartup, High North Newsip, tamanna siornatigut allaaserereerpaa.

Nuuk qitiussaaq

Nuummi nutaamik mittarfeqalerneratigut, Thomas Westergaardip naatsorsuutigisaatut, takornariarpassuit Nuummut aamma Kalaallit Nunaata sinneranut tikittalissapput, Nuuk ukiut amerlanngitsut qaangiuppata Hurtigrutenimut qitiusumik tikittaganngussalluni.

Umiarsuaatileqatigiiffit Nuummi annertuumik aningaasaliiniarpoq, Kalaallit Nunaannilu illoqarfiit pingaarnersaat Nunatsinnut aamma Issittumut Canadamut umiarsuarnik takornariartaatinik angallassisarnermi takornarianut isaavittut atorniarlugu.

Hurtigruten ilaatigut Nuummi akunnittarfimmik 150-inut inissalimmut sanaartortitsinermigut 190 millionit koruuninik aningaasaliiniarpoq. Pisortap oqarnera naapertorlugu ingerlatseqatigiiffik Ilulissani akunnittarfiliornissamik isumaliutersuuteqarpoq.

- Hurtigrutenip Kalaallit Nunaat periarfissalerujussuartut isigaa, Thomas Westergaard, Sermitsiaq.AG-mut taama oqarpoq.

Thomas Westergaardip oqarnera naapertorlugu, Nuuk Nordvestpassagemut, Canadamut aamma USA-p sineriaanut Islandimullu tunngatillugu qitiusumik inissisimavoq.

Naalakkersuinermik suliaqartut utaqqisariaqaraat

- Kalaallit oqartussat Nuummi mittarfissuup aallartilersimaneranut aamma aningaasaliisimanerannut utaqqisariaqarpugut. Aatsaat taamaaliortoqareerpat illoqarfimmi aninigaasaliinissamut pilersaarutivut aallartissinnaavagut. Soorunami Nuummi mittarfiup allineqarnerata qanoq pissanera paasitinnagu, pilersaarutit annertuut aallartissinnaanngilagut. Akunnittarfimmut nutaamut aningaasaliinermut imaluunniit nunami sulianut allanut aningaasaliinermut tunngatillugu, Hurtigrutenimi pisortaaneq, Thomas Westergaard oqarpoq.

Nuummi mittarfissuaqalissappat, umiarsuit Nuummi aallavilerlutik aasaanerani Kalaallit Nunaanni aamma Canadap avannaani angalasarnissaat anguniagaavoq.

- Nuummi annerusumik aallaaviliornissatsinnik tamanna isumaqarpoq, taanna sikoqanngitsumik kusanartumik talittarfeqarpoq. Imaannarmut qanippoq, Kangerlussuarmitullu kangerluup qinnguaniinnani, Thomas Westergaard oqarpoq.

Tamatumunnga taarsiullugu umiarsuit ukiukkut Qalasersuaq Kujallermi, nunarsuup affaani kujallermi aasaanerani angalasassapput.

Hurtigrutenip takornariartui siunissami Nuummut aamma Kalaallit Nunaat tamakkerlugu aningaasaliisarnissaat, Thomas Westergaardip ilimagaa.

Hurtigrutenip Norgep qeqertaanni Svalbardimi akunnittarfii pingasut aamma nunami sammisaqartitsivii allat ukiumut norskit koruuniinik 320 millioninik kaaviiaartitaqartarput, taakku danskit koruuninngorlugit 250 millionit missaanniipput.

Hurtigruten tassani takornarissanut ilaatigut qamuteralannik, angallatinik aamma qimussinik angalatitsinermik neqerooruteqartarpoq.

Periarfissarujussuaq

- Kalaallit Nunaanni periarfissaq annertuvoq. Periarfissat Svalbardimit annertunerupput. Takornariartugut Nuummukarusunngillat, nunaqarfiit aamma illoqarfiit allat tikikkusuppaat. Tassa Ilulissat aamma Tunu Kujataalu, pisortaaneq naqissusiivoq.

- Hurtigruten illoqarfinni allani aamma akunnittarfiliornissaa takorloorpiuk?

- Aap, tamanna takorloorsinnaavara. Assersuutigalugu Ilulissani. Ilulissani aamma nutaamik mittarfeqalissappat, Ilulissat pilerisatta tulleraat, Thomas Westergaard oqarpoq.

Powered by Labrador CMS