urandebat

Hurraartuuppugut inuiattullu erinarsuut atorlutigu

Atortussiassanut uranimik akulinnut akuersaanngilluinnarnerup atorunnaarsinneqarnera Siumup Atassutillu qanoq nalliussigaat takuuk

Assi toqqarsivimmit. Atassutip siulittaasua Gerhardt Petersen Siumumeersorlu Vittus Qujaukitsoq

Sisamanngormat unnukkut Kalaallit Nunaanni uranimut atortussiassanullu uranimik akulinnut akuersaanngilluinnarnerup atorunnaarsinneqarnera piviusunngormat tupaallannanngitsumik tamanna Siumumi Atassummilu nuannaarutigineqarpoq.
Inatsisartuni taasinerup kingorna ajugaasut Siumut Atassullu Siumup ataatsimiittarfianukarput, akuersaanngilluinnarnerup atorunnaarsinneqarnera nalliussiniarlugu.
– Hurraartuuppugut inuiattullu erinarsuut atorlutigu, Atassutip siulittaasua Gerhardt Petersen Sermitsiaq.AG-mut oqaluttuarpoq.
– Aleqa (Hammond, aaqqiss.) uangalu oqalugiaatigaarput atorunnaarsitsineq Nunatsinnut qanoq pingaaruteqartigisoq. Siunissami 1 milliard koruunit amigaatigilertussaavagut, akuersaanngilluinnarnermillu politikkip atorunnaarsinneqarnera aqqutissiuussisinnaavoq, taamaasilluni aningaasartuutissat tamakkua matussutissinneqarsinnaallutik, Atassutip siulittaasua nuannaartoq oqarpoq.
Tapersersornqarnerunissaq neriuutigisimagaluarpaa
Gerhardt Petersenip neriuutigisimagaluarpaa akuersaanngilluinnarnerup atorunnaarsinneqarnissaanut partiit amerlanerusut isumaqataanissaat.
– Soorunami pissanngatigisimavarput Inatsisartuni taasineq qanoq inerneqassanersoq. Oqiliallaatigaara suliassaq Inatsisartuni naammassineqarluarmat. Soorunami neriuutigisimagaluarparput akuersaanngilluinnarnerup atorunnaarsinneqarnissaanut partiit amerlanerusut isumaqataassasut, politikkili taamaappoq, Gerhardt Petersen oqarpoq.
Siumup ataatsimiittarfiani nalliussinerup kingorna politikerit arlallit Siumumeersut Atassummeersullu Hotel Hans Egedemukaapput nalliussineq nangikkiartorlugu.
Urani pillugu allaaserisarpassuit atuakkit uani

Powered by Labrador CMS