Hoteliutillip isornartorsiuinera kommunimit ilumuunnginnerarneqarpoq

- Tatiginanngitsutut ilinnut saqqummiussiniartoqarsimaneranik misiginerit uggoraarput, taamaasiortoqarnikuunngilarmi aamma taanna anguniagaanikuunngilaq.

Kommune Kujallermi pisortaaneq Kim Dahl Jim Riisimut allakkanik ammasunik akissuteqaammik allappoq.

Ilumuunnginneraaneq

Taamaasilluni Hotel Qaqortumi pisortap Jim Riisip Kommune Kujallermik isornartorsiuinera kommunimit ilumuunnginnerarneqarpoq. Jim Riis ippassaq marlunngormat allakkanik ammasunik ilaatigut kujataani inuussutissarsiorneq isornartorsiorpaa, aamma inuussutissarsiortut siunnersuisooqatigiiffiannut tunngatillugu allappoq, kommunip inuussutissarsiortut allat saaffigisimagai Jim Riis inuussutissarsiornermut siunnersuisooqatigiinni siulittaasunngussanngitsoq isumaqatiginiarneqarsimasut, naak Jim Riis siulittaasutut sassarnianngikkaluartoq.

Inuussutissarsiornermut siunnersuisooqatigiit pilersinneqarnissaannut ataatsimiittoqarnerani illoqarfiit pingasut aamma Narsarsuaq siunnersuisooqatigiinni ilaasortaatitaqarnissaat qulakkeerniarneqarsimasoq kommuni allakkani ammasuni ilisimatitsivoq.

Kujalleq: Paatsooqatigiittoqarpoq

- Tamanna tupinnartuliaanngilaq, tassami sumiiffinni taaneqartuni ilaasortaatitaqarnissaq kisimi siunnerfigineqarpoq. Inuussutissarsiortut aamma kommunip ataqatigiinnerunissaat anguniarlugu siunnersuisooqatigiiffik pilersinneqarpoq. Kikkut tamat oqartussaaqataanerat malillugu ingerlavoq, tassani ilaasortat kommunimit oqartussaaffigineqarnatik, Kim Dahl allappoq.

- Tamanna inummut tatiginninnginnermik saqqummiussiniarnerunngilaq, paatsooqatigiinneq tamaanga killitsinneqassasoq neriuutigaara. Siunnersuisooqatigiit pilersinneqarnerannut kikkut tamat oqartussaaqataanerat malillugu ingerlanneqarpoq, tassani aamma siulersuisussanik toqqaasoqarluni, kommunimi pisortaaneq ilisimatitsilluni allappoq.

Toqqorterisoqarpoq

'Akissuteqaat toqqorteriniarneruvoq - taamatut akissuteqaateqartoqarnissaa naatsorsuutigilluinnarsimavara', Jim Riis allakkani ammasumi akissuteqaateqarpoq.

Aamma neriuutini allakkani ammasumi saqqummiuppai:

- Siunnersuisooqatigiiffik aallarsaaqataassasoq neriuutigilluinnarpara, tassami ukiorpassuarni maani immikkoortortaqarfimmi nilliaatigiuarsimavarput iliuuseqartoqartariaqartoq, Jim Riis allappoq.