Malunnartitsineq
Hotel Narsarsuaq isertortumik akerliussutsimik takutitsiffigineqarpoq
Hotel Narsarsuaq, ukiut tamaasa millionilinnik amerlasuunik amigartooruteqartartoq, ukiuni kingullerni sipaartariaqarsimavoq sulisunillu soraarsitsilluni. Maanna innuttaasut qisuariarput allagartarsuarnik sakkortuunik oqaasertalinnik akunnittarfiup saavanut ilioraallutik
– Uagutsinnut nutaajulluinnarpoq sipaarniuteqarnerit taama sakkortutigisumik qisuariarfigineqarmata.
Taamatut oqarpoq Mittarfeqarfinni attaveqarnermut pisortaq Hans Henrik Lichtenberg, taassumalu sapaatiummat takuvaa sapaatip akunnerata naanerani akunnittarfiup saavanut allagartanik inissiisoqarsimasoq soorlu imatut allagartalimmik: ´Danmarkimut Aasiannullu aallaritsi´.
– Soorunami nuanniitsorujussuuvoq, akunnittarfimmik aqutsisoq qallunaaq oldfrue-lu, Aasianneersoq, toqqaannartumik pineqarmata. Tamatumunnga pissutaasimassaaq sipaarniuteqarsimagatta, tamatumunngalu atatillugu sulisunik arlalinnik soraarsitsilluta. Tamannalu tamatigut annernartarpoq, pingaartumik inuiaqatigiinni taama ikitsigisuni, tassami manna tikillugu akunnittarfiup ingerlannerani 28-t sulisorisimagaluarpavut, Hans Henrik Lichtenberg oqarpoq.
Taanna Sermitsiaq.AG-mut oqarpoq Mittareqarfiit akerliussutsimik takutitsineq pimoorukkaat, ingerlaannarlu misissulerniarlugu suna pissutaanersoq, akerliuniarnerullu qaangernissaanut aaqqiissutissarsiorluni.