Hotel Ilulissap ammarfissaa ullulerneqarpoq
Ilulissat Hotel, marsimi ikuallattoq, juunimi ammassaaq.
Akunnittarfissaq nutaaq, Hotel Ilulissat, 78-nik ineeraqartussaq kiisalu arfineq marlunnik konferencelokaleqarlunilu ataatsimiittarfeqartussaq, juunip 15-ani ammarneqassaaq.
Hotelimi pisortaaneq Karl Sandgreen Sermitsiaq.AG-mut ilisimatitsivoq.
Ulluni sisamani kinguaattoorneq
Illorsuup qaava marsip arfineq aappaani ikuallappoq. Naak ikuallangaatsiartutut isikkoqarsinnaagaluartoq, illorsuaq annertunerusumik eqqorneqanngilaq.
- Ikuallattoqannginnerani naatsorsuutigisimagaluarparput akunnittarfik juunip 11-ani atoqqaarfissiortinneqassasoq, taamaattumik ammarfissaa ulluni sisamaannarni kinguartipparput. Akunnittarfissap sananeqarnera pitsaasuuvoq, sanaartortut atortui ikuallattoqarnerani annerusumik eqqorneqarlutik, Karl Sandgreen oqarpoq.
Taamaattumik akunnittarfiup juunip 15-ani atoqqaartinneqarnissaanut qilanaalereerpoq.
Sulisut 25-t 30-llu akornanni sulisoqassaaq
- Ikuallattoqarnera eqqissilluta tiguarput, inniminniinerit aamma ingerlatiinnarneqarput. Hotel Ilulissat inuiaqatigiinnut sunniuteqarluassaaq, nunaqavissunik sulisoqassalluta, Karl Sandgreen oqarpoq. Ilulissani innuttaasut juunip 18-ani, 19-ani aamma 20-ani akunnittarfittaaq takornariarnissaanut periarfissinneqassasut aamma ilisimatitsissutigaa.
Hotel Ilulissat 25-t 30-llu akornanni sulisoqassaaq, teknologi qaffasissoq ineeqqani ataatsimiittarfinnilu atorneqassalluni.
Inuussutissarsiornikkut suliaqartut Frank aamma Tommy Bagger kiisalu Polar Seafoodimit Jens Salling akunnittarfiliornermut aallarnisaasuupput.