Ilulissat
Hotel Arctic ukiumi naatsorsuusiorfiusumi rekordileeqqippoq
Hotel Arctic-ip ataatsimeersuaqqammernerani pisortaaneq Erik Bjerregaard nuannaajummernartumik takornariat unnuisartut amerliartortut oqaluttuaraa
Ilulissani takornariaqarneq siuariartupiloorpoq.
Tamanna Hotel Arctic-imi malugineqarsinnaavoq.
Hotel Arctic-ip ataatsimeersuarnearni akunnittarfiup ukiumi naatsorsuusiorfiusumi 2014-imi angusai saqqummiunneqarput, siulersuisunillu ´naammagisimaarneqarlutik´.
Akunnittarfiup ukiuni 30-ni atuussimanerani manna tikillugu ukioq 2013 takornariaqarnikkut pitsaanerpaajusimagaluartoq 2014-imi qaangerneqarpoq, pisortaaneq Erik Bjerregaard oqarpoq.
Aningaasarsiornikkut ajornartorsiornerup
kingorna ingerlallualersimavoq
– 2008-mi ukiakkut takornarissat aatsaat taama amerlatigileruttortut, aningaasarsiornikkut ajornartorsiornerup atuutilernerata kingunerisaanik 2009-mi kinguariarnerup kingorna ussassaaruteqarnikkut suliniuteqarpassuit ineriartorneq mumisissimavaat. Taamaasilluni takornariat unnuisartut 2010-miit 2014--imut 45 procentimik amerleriarsimapput, pingaartumik 2012-imiilli amerliartorlualersimallutik, Erik Bjerregaard nassuiaavoq.
– Ilulissanut nuannersortaa pingaartumik tassaasimavoq siuariartorneq pisimammat piffittut angalanikiffiusutut taaneqartartut nalaanni, tassa juunip tungaanut aammalu oktobarimiit, Hotel Arcticip pisortaanera erseqqissaavoq.
Visit Greenland nersualaarpaa
– Sunniuteqarluartumik ussassaarinerup saniatigut timmisartuni inissaqarnerup siuariartorneq tamanna pilersissimavaat. Islandimut takornariaatigaluni Ilulissanut takornariarsinnaaneq ukiuni tallimani atuussimavoq. Taamatuttaaq Air Greenland-ip Airbus-iani inissat amerlanerulernerat pingaaruteqarsimavoq. Takornartat nutaat, pingaartumik Islandikkoorlutik tikittut, illoqarfimmi takussaalersimapput, pingaartumillu Kina-mit amerlanerusut tikittalernissaat naatsorsuutigaarput, Visit Greenlandip suliniuteqarluarneratigut, Erik Bjerregaard oqarpoq.
Ukiumi angusat kingusinnerusukkut saqqummiunneqassapput
– Hotel Arctic Ilulissani unnuisarfinnit tamanit ukiumut unnuisarfiunersaammat ilimanarluinnarpoq illoqarfimmi unnuisarfiit allat - ingerlatsiviillu takornarianik misigisassarsiortitsisartut - aamma takornariat amerleriarnerat misigisimassagaat, Erik Bjerregaard oqarpoq.
Akunnttarfiup ukiuni angusai tamanut aatsaat saqqummiunneqarsinnaapput suliffeqarfissuup Air Greenlandip naatsorsuusiani tamarmiusut saqqummiuppagit, naatsorsuutigineqarporlu tamanna pissasoq marsimi.