Skip to main content

Hormuzip Ikerasaanut sorsuummik umiarsualiisoqassasoq

Danmarkimi naalakkersuisut umiarsuarmik sorsuummik fregattimik qulimiguulittalimmik inunnillu 150-it angullugit amerlassusilinnik 2020-mi ukiakkumiit qaammatini sisamani Hormuzip ikerasaanut aallartitsiniarput

Taama nunanut allanut ministeri Jeppe Kofod (S) aamma illersornissamut ministeri Trine Bramsen (S) Nunanut Allanut Ataatsimiititami sisamanngornermi ataatsimiittoqareersorlu ilisimatitsipput.

- Suliniuteqarnermut tapersiissummit matumannga umiarsuaatitta aarlerinarsorsioratik ingerlaarsinnaalernissaat qulakkeerinneqataaffigineqassaaq, nunanut allanut ministeri Jeppe Kofod oqarpoq.

Danmarkimi suliniuteqarnermut tapersiissutigineqartoq nutaaq Hormuzip ikerasaani suliassamut Europamiunit  siulersorneqartumut ilaatinneqassaaq. Tamatuma saniatigut sakkutuut naalagaat officerit ataaseq marlulluunniit Abu Dhabimi qullersaqarfimmi franskinit siuttuuffigineqartumi qaammatini 12-ini sulisussat tapersiissutigineqassapput.

Hormuzip ikerasaa nunat tamalaat akornanni uuliamik niuernermut pingaaruteqarpoq tamatumalu saniatigut illersornissakkut pingaarutilerujussuulluni. Piffissap ingerlanerani eqqissiviilliorfiusimavoq, aasarlu uuliamik assartuutinut arlaleriarluni saassussisoqarsimalluni kiisalu tuluit umiarsuaannik arsaarinnissutiginnittoqarsimalluni.

Iran uuliamik assartuutinut marlunnut saassussinermut tunuliaqutaasutut USA-mit pasillerneqarsimavoq, tamannali Iranimi naalakkersuisunit ilumuunnginneraqarsimalluni.

Taamaattorli Iran tuluit umiarsuaannik arsaarinnissuteqarsimavoq, tamannalu Iranip uuliamik assartuutaata “Grace I”-ip, Gibraltarip eqqaani aasaq arsaarinnissutigineqartup, tigummineqarneranut akiniaanerulluni.

Hormuzip ikerasaa Omanip Iranillu akornanniippoq Golfimilu nunanut arlalinnut atassuteqartitsisuulluni. Taakkua tassaapput Irak, Kuwait, Saudi-Arabia, Bahrain, Qatar aamma Forenede Arabiske Emirater.

Danmarkimi naalakkersuisut umiarsuup aallartinneqarnissaa sioqqullugu siunnersuut Folketingimi saqqummiunniarpaat.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER