Hønge: Naalagaaffimmik pilersitsineq pingaaruteqarpat, Siumut qaqugut suliassaqarfinnik angerlaassuiniarpa?
Folketingimi sisamanngornermi annertuumik oqallittoqarnerani oqaaseq naalagaaffeqatigiinneq aamma Kalaallit Nunaata namminiilivinnissaa Aki-Matilda Høegh-Damit (S) aamma Karsten Høngemit (SF) oqallisigineqarput.
Ministeriunerup Mette Frederiksenip naalagaaffiup inissisimanera pillugu marlunngornermi oqalugiarnera nangillugu, sisamanngornermi danskit Folketingianni annertuumik oqallittoqarpoq.
Unnukkut kingusissukkut akunnerit 12-t missaanni oqallittoqareersorlu, kalaallit folketingimut ilaasortaatitaat oqalugiartussanngorput. Nunat pingasut akornanni ataatsimooqatigiilluni suleqatigiilinngippata, Kunngeqarfiup ullumikkut ataasiulluni naalagaaffiunerani, oqaaseq naalagaaffeqatigiinneq piviusumik tunngaveqarsinnaanngitsoq, Aki-Matilda Høegh-Damip (S) oqaatigaa.
Aki-Matilda Høegh-Dam ilaatigut danskit naalagaaffeqatigiinneq pillugu isumaannik Danmarkimi misissuinermut innersuussivoq:
- Qallunaat amerlanerit kalaallit savalimmiormiullu politikkikkut inissaqartitsinerorusuttut, misissuinermi eqqaaneqartumi aamma paasineqarpoq.
Nunasiaateqarneq qallunaanngorsaanerlu
- Kisianni piviusoq imaappoq, inuiaqatigiit aappaat kiffaanngissusermik periarfissaqarlutik tunisinerusinnaallutik inuiaqatigiinnut aappaannut, takutippaa naalagaaffeqatigiinneq ilumoortoq.
- Naalagaaffeqatigiinneq pillugu eqqarsaatigalugu oqarneratuut ajunngilaq, kisianni piviusuunngilaq, Aki-Matilda Høegh-Dam oqarpoq, Kalaallit Nunaannilu assingusumik misissuisoqassagaluarpat, inernerat pitsaannginnerussasoq isumaliuteqarfigaa:
Oqaaseq Naalagaaffeqatigiinneq tusaagaangatsigu sunik eqqarsartittarpaatigut?
Oqaatsit allaasinnaappat soorlu:Nunasiaataaneq, qallunaanngorsarneq, inuiannik toqoraaneq, pinngitsaalisamik arsaarinnittarneq, pinngitsaalisaalluni matusineq, inatsisitigut isumannaatsuuneq amigartoq imaluunniit race tunngavigalugu immikkoortitsineq, Aki-Matilda Høegh-Dam aperivoq.
Hønge: Suna pilersaarutaava?
Oqalugiarnerata SF-meersoq Karsten Hønge, Siumup naalagaaffimmik pilersitsinissamut sunik erseqqissunik pilersaaruteqarneranik apeqquteqartippaa:
- Siumup pissusissamisoortumik Kalaallit Nunaata namminiilivinnissaanik anguniagaqarnera soorunami ataqqivara.
- Suliassaqarfippassuimmi suli angerlaassorneqanngillat, taakku qaqugu angerlaassorneqarnissaannut Siumup qanoq pilersaaruteqarpa? Namminiilivinnissap naalagaaffimmillu pilersitsinissap oqaluuserineranut taarsiullugu aallartinnissaq pissusissamisuussaaq – taava aallartittoqarniarli. Piffissamut suna pilersaarutaava, Karsten Høngep tamanna paaserusuppaa.
Politiit eqqartuussiveqarnerlu naalagaaffimmik pilersitsinermi tunngavissatut oqaatigineqarsinnaanerannik, politikeri tamatuma kingorna innersuussivoq, Kalaallit Nunaatalu suliassaqarfiit taakku akisussaaffigilissappagit tigulluarneqassasoq oqaatigaa:
- Taakku angerlaanneqarniarpat, tassami Danmarkimi tigulluarneqassaaq, maanimi politiit pinerluttunullu inissiisarfimmi sulisut maanna Kalaallit Nunaanniittut pisariaqartippagut, Karsten Hønge oqarpoq.
Høegh-Dam: Naalagaaffiup nammineq aalajangiisinnaassuseqarneranut tunngavoq
Aki-Matilda Høegh-Dam piffissamut pilersaarummik saqqummiussaqanngilaq, naalagaaffimmik pilersitsiniarneq siullermik nammineq nunagisamik aalajangiisinnaassuseqarnermut tunngatippaa. Pisinnaaffik taanna Kunngeqarfiup Danmarkip ullumikkut tigummivaa:
- Naalagaaffimmik pilersitsineq nammineq nunagisamut aalajangiisinnaassuseqarnermut tunngavoq. Nunap naalagaaffinngorsinnaaneranut suliassaqarfinnik angerlaassaqarsimanermut tunngasumik aalajangersimasumik akissutissartaqanngilaq, Aki-Matilda Høegh-Dam oqarpoq.
Taamatut oqaaseqarnerani Karsten Hønge Siumup naalagaaffimmik pilersitsinissamut piffissamut pilersaarutaanik apeqquteqaqqippoq.
- Partiitut taama nukittutigisunik anguniagaqaraanni, taava pilersaarummik saqqummiussisoqarsinnaasoq naatsorsuutigineqartariaqarpoq, politikeri oqarpoq.
Aki-Matilda Høegh-Dam naalagaaffimmik pilersitsinissamik kissaateqarneq ersarissuusoq maluginiaqquaa, tamannalu suliassaqarfinnik angerlaassuinermut aalajangersimasunik malittarisassartaqannginnerarpaa:
- Taamatut naalagaaffimmik pilersitsisoqarneq ajorpoq. Nunagisami nammineq aalajangiisinnaanermut tunngavoq. Isumaqatigiinngissuteqartoqarnera takusinnaavara, kisianni ataatsimut isigalugu naalagaaffimmik pilersitsinissamut tapersersuisoqarnera nuannaarutigaara, Aki-Matilda Høegh-Dam oqarpoq.