HOMO sapienne isiginnaartitsissutigineqartussanngorpoq

Niviaq Korneliussenip atuakkiaa nuannarineqarluartoq, HOMO sapienne, isiginnaartitsissutigineqarluni aprilip 26-ani 2019-imi takuteqqaarneqartussanngorpoq.

Atuagaq Homo sapienne, 2014-imi saqqummersinneqartoq, oqaluttuarineqaqqilluni isiginnaartitsissutigineqartussanngorpoq.

Nunatta Isiginnaartitsisarfia tusagassiutinut taama nalunaaruteqarpoq.

Atuakkiaq asanninnermut, suiaassutsimut, inuusuttuunermut, kinaassutsimut inuiaqatigiillu akornanni nalilersorneqarnermut tunngasuusoq kalaallisut saqqummeqqaarami atuaasunik tinguaagaatsiarpoq. Atuagaq oqaatsinut assigiinngitsunut arfineq-pingasunut kingorna nutserneqarpoq, qallunaatut, franskisut, tuluttut, tjekkiamiusut, norskisut, islandimiusut tyskisullu atuarneqarsinnaalerluni.

Nunatta isiginnaartitsisarfia naapertorlugu nunat tamalaat akornanni isiginnaartitsisarfiit atuakkap isiginnaartitsissusiarinissaanik soqutiginnipput.

- Tulluusimaarluinnarpunga nunarsuarmi isiginnaartitsisarfinni siullersaalluta atuagaq tunngavigalugu isiginnaagassiorsinnaagatta, isiginnaagassiornitsinnilu Niviaq Korneliussen qanimut suleqatigisinnaagatsigu, Nunatta Isiginnaartitsisarfiani pisortaq, Susanne Andreassen tusagassiutinut nalunaarummi oqarpoq.

Angalaneq

Isiginnaagassiaq upernaaq manna nunatsinni angalallutik isiginnaartitsissutigissallugu Nunatta Isiginnaartitsisarfia pilersaaruteqalereerpoq.

Homo sapienne pillugu isiginnaagassiaq illoqarfinni aqqanilinni takutinneqassaaq.

Isiginnaagassiaq illoqarfinni ukunani takutinneqassaaq:

  • Nuuk
  • Nanortalik
  • Qaqortoq
  • Narsaq
  • Paamiut
  • Maniitsoq
  • Sisimiut
  • Aasiaat
  • Qasigiannguit
  • Qeqertarsuaq
  • Ilulissat

Homo sapienne isiginnaariartunut inuusunnerusunut naleqqussagaavoq. Nunatta Isiginnaartitsisarfia tusagassiutinut nalunaarummini ilisimatitsivoq inuusuttut ukioq manna isiginnaagassaqarnerutinniarlugit suliniuteqarlutik. Isiginnaagassiallu takutinneqarnissaa Susanne Andreassenip qilanaaraa.

- Allagaq allalluagarujussuuvoq. Oqaluttuami pissanganartoqarpoq, misigissutsit sakkortuut atorneqarput, inuttat soqutiginarluinnartuupput ajornartorsiutillu pikkunartuullutik. Atuakkap inuusuttut oqaasii atorpai, taakkulu aamma pimoorullugit tigusariaqarpagut. Inuusuttut oqaluttuuttariaqarpagut ajornartorsiuteqarlutik misigissutsitillu pillugit nunarsuarmi kisimiinngimmata. Tamanna ilaatigut isiginnaagassialiornikkut oqaluttuarisinnaavarput, oqarpoq.

Isiginnaagassiaq minutsinik 90-inik sivisussuseqartoq Nuummi aprilip 26-ani 2019-imi takuteqqaarneqassaaq.

Powered by Labrador CMS