Skip to main content

Holbech kræfti pillugu: Namminerisannik aqqutissarsiorpunga

Jørn Holbechip inuunera kræfteqalerneranit allanngortilluinnarneqarpoq. Ima annertutigisumik, Aarhusimi Kalaallit Illuannut pisortatut tunuarnissani qanittukkut aalajangiullugu, imminut nassaariniarumalluni inuunerullu sinnerata isumaa paasiniarumallugu.

Jørn Holbech Jyllandip Kangiani orpippassuarni pinngitsoorsinnaanngisaminik pisuttuartarnermi ilaanni pisuttualeruttortoq Sermitsiaq.AG-mit oqarasuaatikkut attaveqarfigaarput.

Sooq pisortatut tunuarpit?

- Ukiup ataatsip matuma siorna qinersimi nakasumma sanilequtaaniittumi kræftimik eqqugaavunga. Tamatuma kinguninnguatigut inalukkakkut kræfteqalersimanera aamma paasineqarpoq. Akunnerit qulingiluat sinnerlugit ilungersunartorujussuarmik pilattartinnerma sapaatip-akunnerinilu 24-ni kemortinnerma kingorna inuuneq tassanngaannaq allatut isigineqartariaqalerpoq, Jørn Hornbech nangaanngivilluni Sermitsiaq.AG-mut oqaluttuarpoq.

Napparsimalluni sulinngiffeqarnerit arlallit

57-inik ukiulik maanna pisortaasimasunngortoq pisortatut 2019-imi ingerlaqqippoq, piffissanilu arlalinni napparsimalluni sulinngiffeqartariaqartarluni.

- Krfæteqarunnaarsimasutut nalunaarutigineqarpunga, kisianni taama sakkortutigisumik aqqusaagaqareerluni inuunerup eqqarsaatigeqqittariaqalersimanera oqaatigisinnaavara, oqarpoq.

- Suliffimmi tamakkiisumik sulisinnaajunnaarsimatilluni tamatumalu peqatigisaanik toqup qanillisimanera eqqarsaatigitillugu uippakajaarnermik eqqumiitsumik eqqugaasoqartoqartarpoq. Paasivara pissutsit taamaannerat attanneqarsinnaanngitsoq. Uannuinnaanngitsoq, aammali Kalaallit Illuannut. Pisortatut tunuarninnut tamanna nassuiaatissaavoq, Jørn Holbech oqaluttuarpoq.

Jørn Holbech nalinginnaasumik isumassarsiortuullunilu suliniuteqartuusarpoq. Kræftilersimaneratali suut tamaasa allanngortilluinnarsimavai. Imalu annertutigisumik, taamatut nalaataqarsimanerup ajorluinnartuunera isertuussinnaanagu. Taamaakkaluartoq inerniliisimavoq, nutaamik suliaqalersinnani ilorlikkut kinaassutsini nassaarisariaqarini inuunerullu sinnerani suut isumaqartariaqarnerat paasisariaqarini.

Tamatumunnga piffissamik atuiniarpoq.

Suli pilersaaruteqanngitsoq

- Neriuppunga inuuninnut pilersaarummik nutaamik nassaassallunga. Kisianni pisortatut sulisariaqarninnik uippakajaaruteqarnanga imminut nassaarisariaqarpunga. Ullumikkut pilersaaruteqanngilanga. Tulliuttup suunissaa eqqarsaatigilernissaanut suli eqqissisimanngilanga sulilu nukissaqalersimananga, ataataq ilaquttami sinnerinik, nuliami meeqqamilu pingasut 10-nik, 13-inik 17-inillu ukiullit, aamma eqqumaffiginnittariaqartoq, oqaluttuarpoq.

Aamma atuaruk: Kalaallit Illuanni pisortaq unittoq

- Maannakkorpiaq namminerisannik aqqutissarsiorpunga. Inuunermut nutaamut sinaakkutissarsiortoq, kisianni sumut ingerlanneqassanerlunga nalulluinnarpara, angut Aarhusimi Kalaallit Illuanni ukiuni arfinilinni sulereerluni NUKIGA pilersinneqarmat minnerunngitsumillu Dalgas Avenuemi illorujussuup allilerneqarnissaanut sunniuteqarluarsimasoq unneqqarilluni oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER