Skip to main content

Højskole aningaasanik pissarsinngitsoorsinnaasoq

Knud Rasmussenip Højskoliata aningaasaateqarfinnit 5 million koruunit neriorsuutigineqartut qinersisoqarnissaata kinguneranik pissarsiarinngitsoorsinnaavai

'Inuunerup atuarfia', Knud Rasmussenip Højskolia Sisimiuniittoq aserfallatsaalineqarnissaminut pisariaqartitsivoq, atuarfiummi ineqarfiisa annersaat oquk pissutigalugu matoqqatinneqarput.

Aserfallatsaalineqarnissaalu kingullermik naliliiffigineqarami 22 million koruuninik naleqartussaq tagginneqarpoq.

Knud Rasmussenillumi Højskoliata 7 million koruunit aningaasaateqarfinnit marlunnit qulakkeersimagaluarpai. Tassa AP Møller Fondimit 5 million koruunit kiisalu Augustinus Fondimit 2 million koruunit tapiissutigineqarniartut neriorsuutigineqarsimavoq.

Kisianni aningaasaateqarfiit taakkua marluk tamarmik immikkut piumasaqaatigisimavaat tapiissutigisassatik allanit aningaasaliisoqarpat aatsaat atorneqarsinnaasut, aammalu piffissami aalajangersimasumi atoreerneqassasut. AP Møller Fondimiillu decembarimi naatinnagu atorneqarnissaat qulakkeeqquneqarsimavoq.

Aningaasat qinersisoqarneratigut annaasinnaavaat
Maannalu Knud Rasmussenip Højskolianit ernummatigineqalerpoq aningaasaateqarfinnit aningaasaliissutissat qinersisoqarnerata kinguneranik annaaneqarsinnaaneri.

Namminersorlutimmi Oqartussanit qinersisoqarnissaa sioqqullu neriorsuutigineqarsimagaluarpoq 15 million koruunit sinnerut matuneqarumaartut, kisianni:

- Ilinniartitaanermut naalakkersuisoqarfimmit ilisimatinneqarpugut aningaasaqarnermut ataatsimiisitaliap suliassaq tigugajassimagaa, kisiannili tamanna qinersisoqarnissaata suaarutigineqarneranit maanna kinguartinneqartoq, Højskolip pisortaa, Lise Lennert Olsen oqarpoq, nangillunilu:

- Taamaammat qinersinissap kinguneranik Augustinus Fondimit aningaasaliissutaaniartut annaasinnaavagut. Taakkuami decembari naatinnagu atorneqarnissaannut qulakkeereqqusimmata.

Knud Rasmussenip Højskolia ingerlatsinermut tapiiffigineqartarpoq. Tapiissutilli nalimmassarneqarsimanngillat. Højskolillu nammineq aserfallatsaaliineq isumagisussaangamiuk tassunga aningaasartuutissat sipaarniarfigisarsimavai.

Pilersaarutaangaluarpoq Namminersorlutik Oqartussat Knud Rasmussenip Højskoliata illutai tamaasa pissagai aserfallatsaaliinermut tapiissuteqareeruni. Kisiannili tassa maanna nalorninarsivoq højskoli aserfallatsaalineqassanersoq.

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER