Høegh-Damip inuttai Tasiilami qimaannarneqartut

Ullut aqqaneq-marluk.

Angutit arfinillit arnarlu ataaseq kilisaammit Tasiilamut juunip 27-iani niusitaanerannit piffissaq taama sivisutigisoq qaangiutereerpoq.

Unnuit siulliit silami sinittariaqarsimapput, kommunilli ikiuunnerata kingorna illumi inoqanngitsumi maanna najugaqarallartinneqarlutik.

Pingasut aallareersimapput. Angutilli sisamat kiserngoruttut aningaasaateqanngillat, nerisassaqaratik, ilaquttaminniit ikinngutiminniillu ungasissorsuarmiipput.

Taakku kilisaammi “Narluneq”-mi inuttaagaluarput, tunumilu qaleralinniarlutik aalisartussaagaluarlutik.

- Tasiilami ilisarisimasaqanngilagut. Ikinngutitaarpugut, taakkulu nerisassanik ilaatigut qinuffigisinnaasarpagut. Iffiaq-qaqortumininnguaq yum-yum-illu eqqaassanngikkaanni, ippassarli iluamik suli nerinngilagut, inuttat ilaat, Boas Stephensen Sermitsiaq.AG-mut oqaluttuarpoq.

Kilisaammi aaqqiagiinnginneq

Sooq angutit kilisaammiit niusariaqarneranut nassuiaat apeqqusernartoqarpoq. Angutimmi oqaluttuarisaat kilisaatip “Narluneq”-up piginnittuanit Kim Høegh-Damimit allaaneruvoq.

Angutit inuusuttut oqaluttuarput igasup kilisaammilu inuttat Spaniameersut Savalimmiuneersullu akornanni aaqqiagiinngitsoqarsimasoq, taamaammallu igasoq aappaalu inuttaaqataasoq illoqarfimmi qaninnermi niorusulersimallutik. Inuttaaqataasut kalaallit tallimat aamma niorusulersimapput, taakkuli Kitaani niorusussimallutik.

Taamaakkaluartoq Tasiilami niusinneqarput. Akissarsiaqaratik. Qaqortumut najukkaminnut angerlarnissaminnut billetsissaqaratik.

- Suuteqaavinngitsugut qimaannarpaatigut. Akissarsitinneqanngilagut. Naluarput qanoq iliussalluta. Kilisaatillu piginnittua oqaannarpoq nammineerluta niorusussimasugut, Boas Stephensen Qaqortumeersoq oqaluttuarpoq.

Aalisagaqanngilaq

Boas Stephensen angutit inuusuttut allat peqatigalugit kilisaammi “Narluneq”-mi inuttanngornissamut neqeroorfigitissimavoq. Taamaammat suliffimminit soraarpoq Nuummullu aallarluni Kim Høegh-Damip suliffeqarfiutaani suliartorluni.

Nuummi kilisaat sapaatip akunnerat ataatsip missaani iluarsartuuppaat, kingornalu avalapput Tunumullu aallarlutik. Qaleralinniassasut ilisimatinneqarput.

- Pisaqanngilagut. Aalisarfigisaqarput aalisagaqanngilaq. Avataaniinnitsinni qalerallit arfinillit qaqippagut, oqaluttuarpoq.

Inuttaasimasut sisamat, Boas Stephensen, Nuka-Frederik Jakobsen, Emanuel Knudsen aamma Jakob Poulsen kommunip ikiorsiineratigut illumi inoqanngitsumi maanna najugaqarput. Tasiilami innuttaasunit ilaatigooriarlutik nerisassaqartinneqartarput. Taamatulli inuunissaq soorunami pissusissamisuunngitsoq, Boas Stephensen oqarpoq.

- Maani ikiorneqarnerput qujamasuutigeqaarput. Maaniittuaannarsinnaanngilagulli, oqarpoq. Taassuma ilanngullugu ilisimatitsissutigaa kilisaatip piginnittua politiinut nalunaarutiginissaa ilanilu eqqarsaatigigitsik.

Unnerluutit eqqunnginnerarpai

Sermitsiaq.AG-p kilisaammik piginnittoq Kim Høegh-Dam attaveqarfigaa.

Taanna naatsumik oqarpoq unnerluutigineqartut eqqunngitsuusut, inuttallu Tunumi niuunnarneqarsimanngitsut.

- Namminneruku Tasiilamut niorusuttut. Pinngitsaalillugit niusitaanngillat. Immaqa isumaqarsimapput Tasiilami nuannersumik feriassallutik. Akissarsianut tunngatillugu paasissutissat pigutsigit soorunami akissarsitinneqassapput, Kim Høegh-Dam ilisimatitsivoq.