Skip to main content

Høegh-Damip ingerlatseqatigiiffiutaa ajornartorsiortoq

Iluliaq Seafood Kim Høegh-Damimit aqunneqartoq pillugu 2019-imut naatsorsuutit kingusinaarujussuarluni tunniunneqarsimapput, ukiumilu angusarineqartut atuassallugit nuannerpallaassanngilaq, 2018-imimi 3,7 millioner koruuninik amigartooruteqarsimariarluni 2019-imi amigartoorutai 8,2 millioner koruuninngorsimapput.

Ukioq 2019 Kim Høegh-Damip ingerlatseqatigiiffiutaanut Iluliaq Seafood A/S-imut ajorluinnartumik angusaqarfiusimasutut oqaatigineqarsinnaavoq.

2019-ip ukiuata affaani siullermi ningittagarsuut ”Narluneq” ukiumi kingusinnerusukkut aalisalernissamut piareersarlugu amutsivimmiitinneqarsimavoq. Amutsivimmiitinneqareerlunili septembarip qaammataani umiuvoq, taamalu ingerlatseqatigiiffimmut isaatitsissutigineqarsinnaanani. Angallat 2020-mi ukiakkut nunamut qaqinneqarpoq, umiuneranullu sillimmasiissutaasimasut 2019-imut naatsorsuutini ilaatinneqaratik.

Kim Høegh-Dam 2019-imi spaniamiunik piginneqateqalerpoq, Worldwide Fishing Company SL, taakku aalisariummik tikiussissimapput, aalisariulli aalisarnissamut Kalaallit Nunaanni oqartussanit akuerineqanngisaannarsimalluni. Spaniamiut piginneqataasut 2020-mi Iluliaq Seafoodimit tunuarlutik piginneqataajunnaarsimapput, spaniamiullu aalisariutaat utertinneqarsimalluni.

Aamma atuaruk: Høegh-Damip aalisariutaataa aalisarnissamut itigartinneqartoq

Nammineq aningaasaatitigut 14 millioner koruuningajalluinnarnik amigartooruteqarmat, ingerlatseqatigiiffik atuutiinnassanersoq qularnarpoq.

Aqutsisut nalunaarusiaanni ilaaatigut allassimavoq:

- Ingerlatseqatigiiffimmit pinngitsoorneqarsinnaanngilaq, aningaasaliissuteqartartut aningaasanik suli atugassiissuteqartarnissaat. Aqutsisunilli nalilerneqarpoq aningaasanik suli atugassiisoqarsinnaasoq, tamannalu naapertorlugu ukiumoortumik nalunaarusiami suli ingerlatsisoqarsinnaanera naatsosuutigineqarluni, ”ingerlatseqatigiiffiup suli ingerlanneqarsinnaanera” pillugu qularuteqarnermut tunngatillugu allassimavoq.

Akiitsut isumakkeerutigineqarsimasut

Kim Høegh-Damip ingerlatseqatigiiffiup akiitsuini en million koruuningajalluinnaat isumakkeerinnissutigitissimavai, aamma aqutsisunit ilisimatitsissutigineqarpoq, tamatuma saniatigut ”suliffeqarfissuup avataatigut spaniamiut ingerlatseqatigiiffiutaannit 3.788.000 kruuninik pissaqartoqartoq”.

Akiitsut katillugit 46,5 millioner koruuniusutut naatsorsorneqarsimapput. Ilisimatitsissutigineqarporli spaniamiut aalisariutaannik utertitsinermi akiitsut 33 millioner koruunit sinnilaarlugit ilanngarneqarsimasut. Taamatulli nuussisimaneq angusanut marluusunut sunniuteqanngilaq: tassa ukiumi angusanu namminerlu aningaasaatinut sunniuteqanngilaq.

Iluliaq Seafood A/S-ip ukiuni pingasuni kingullerni naatsorsuutaani kisitsisit pingaarnerit
Pissarsiffik: Lasso.dk

Ukiuni siusinnerusuni lluliaq Seafoodip naatsorsuutai maajip qaammataaniit aggustusip qaammataata tungaanut tunniunneqartarsimapput. Ukioq manna naatsorsuutit aatsaat novembarip 16-iani Suliffeqarfinnut Qitiusumik Nalunaarsuisarfimmi nalunaarsorneqarsimapput, tamatuma malitsigisaanik kukkunersiuisartoq naalagaaffimmit akuerisaasoq Kenneth Bach Holmegaard Multi Revision I/S-immersoq imatut nalunaaruteqarpoq:

- Ingerlatseqatigiiffimmi aqutsisut 2019-imut naatsorsuutit piffissaagallartillugu akuersissutiginiarlugit ileqquusumik ataatsimeersuarsimanngilllat. Ta,anna Ukiumoortumik naatsorsuutit pillugit inatsimmut akerliuvoq, aqutsisullu tamatumunnga akisussaatinneqarsinnaapput.

Uppernarsaatit amigaataasut

Kukkunersiuisartut allat marluk nalunaarutaat naatsorsuutinut aamma iluaqutaasussatut isikkoqanngillat. Kukkunersiuisartoq allassimavoq, ”ingerlatseqatigiiffik eqqortumik piffissaagallartillugulu akileraarutinut A-nut akiliuteqarsimanngilaq, aqutsisullu tamatumunnga akisussaatinneqarsinnaapput”.

Aamma ”ingerlatseqatigiiffiup aningaasartuutigisimasaasa ilaat pingaarutillit uppernarsaatissaqartinneqanngillat. Ingerlatseqatigiiffimmi aqutsisut taamaalillutik naatsorsuinissamut inatsit malissimanngilaat, taamalu akisussaatinneqarsinnaallutik”.

Sermitsiaq.AG-mit Kim Høegh-Dam naatsorsuutit pillugit oqaaseqartinniarneqaraluarami iluatsinneqarsimanngilaq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER