Skip to main content

Høegh-Damip ingerlatseqatigiiffiata piginnittui amerlipput

2018-imut naatsorsuutit kusanarpallaanngikkaluartut, ingerlatseqatigiiffik Høegh-Damimit pigineqartoq Iluliaq Seafood A/S, amerlanerusunit pigineqalerpoq.

OBS: Piginnittuunermut tunngassuteqartut ataasinngornermi nalunaaqutaq 9:45 nutarsarneqarput, aaqq.

Iluliaq Seafood A/S-ip ukiumoortumik naatsorsuutai naapertorlugit 3,7 milliuunit koruuninik amigartooruteqaraluarluni, aningaasallu nammineq uninngasuutigineqartut -5,6 milliuunit koruuniugaluartut, taamaattoq Kim aamma Bitten Høegh-Dam nutaanik piginneqataasinnaasunik pissarsisimapput.

Naatsorsuutit maajip arfineq-pingajuani tunniutereernerisa kingorna, ingerlatseqatigiiffik suliffeqarfiit qitiusumik nalunaarsorneqartarfiannut (CVR) marlunnik nalunaaruteqarpoq.

Iluliaq Seafood maajip 16-ani nalunaaruteqarpoq ingerlatseqatigiiffik pingasunik piginnittoqalersoq, taakkulu ingerlatseqatigiiffimmut ima piginnittuusut:

  • 50-67 procent: Kim Høegh-Dam
  • 15-20 procent: Bright Harvest Investments SL
  • 15-20 procent: Worldwide Fishing Company SL

Piginnittuunermut tunngassuteqartut ersarissumik nalunaarsorsimanngillat, nalunaarusiamili piginnittuunermut tunngassuteqartut, periuseq nalinginnaasoq naapertorlugu nalunaarsorneqarsimallutik. Tamannalu nalinginnaasuuvoq.

Nalunaarummi maajip 16-ani tunniunneqartumi aamma allassimavoq ingerlatseqatigiiffik nutaamik siulersuisuni siulittaasortaartoq, tassa spaniamiu Enrique Porto de la Calle.

Siulersuisuni ilaasortaq nutaaq

Ingerlatseqatigiiffik nalunaaruteqarneranit sapaatit akunneri sisamanngulersullu suliffeqarfiit qitiusumik nalunaarsorneqartarfiannut nutaamik nalunaarusiortoqarpoq.

Juunip 13-ani nalunaarutigineqarpoq Manuel Antonio Vidal Pego siulersuisuni ilaasortaajunnaartoq, José Ramon Garcia-Gallardo Gil Fournierilu ilaasortanngorluni.

Ingerlatseqatigiiffiup aaqqissuunneqarnerani paasinarsivoq Bitten Høegh-Dam inissaqartinneqanngitsoq. Taanna pisortaqarfimmi siulersuisunilu siornatigut issiasimavoq. Ukiumut 2018-imut naatsorsuutit saqqummiunneqarmata pisortaqarfimmiikkunnaarsimavoq, siulersuisunili ilaasortaalluni.

Piginneqataasulli nutaat ilanngummata siulersuisuni aamma ilaasortaajunnaarpoq.

Mallorca-mi adresseqartoq

Sermitsiaq.AG-p paasivaa Bright Harvest Investments SL Spaniap ungasinngisaani takornariarneqartartumi Mallorcami inissisimasoq, Sermitsiaq.AG-p paasivaa. Spaniami ingerlatseqatigiiffiit pillugit nittartagaq naapertorlugu, suliffeqarfik ukioq manna apriilip tallimaanili pilersinneqarsimavoq.

Worldwide Fishing Company SL sivisunerusumik ingerlanneqareerpoq, Portugalimilu talittarfeqarfimmi Vigomi inissisimalluni.

Sermitsiaq.AG-p Kim Høegh-Dam toqqaannartumik sianerfigalugu kiisalu naatsorsuuserisoq attavigalugu oqaaseqartitsiniarsimagaluarpoq, iluatsinngitsumilli.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER