Høegh-Damip ingerlatseqatigiiffia amigartooruteqarujussuartoq

Iluliaq Seafood A/S aalisarnerup iluani ingerlataqartutut Namminersorlutik Oqartussanit arlaleriarluni pisassinneqartarsimavoq, 2018-imili avaleraasartoortassanut makitsinermi iluatsitsinngitsoorami pisassinneqarsimanani.

Ukiup ingerlanerani agguaqatigiissillugu marlunnik piffissaq tamakkerlugu atorfeqartitsisoqarsimavoq, katillugit 751.755 koruuninik akissarsiaqartinneqarsimammata, amigartooruteqarneq annertusiartorsimasoq, naatsorsuutini atuarneqarsinnaavoq.

Naatsorsuuserisoq inerniliussaqarsinnaanngilaq

Ukiumut naatsorsuuserititsinermut inatsit malillugu, ukiuni siuliini taama iliortarsimanngikkaluarluni, suliffeqarfiup 2017-imi naatsorsuutini naatsorsuuserisumut suliakkiussimavai. Naatsorsuuserisorlu naalagaaffimmit akuerisaasoq takisuumik nassuiaateqarpoq, ersarilluinnartumillu nassuiaalluni sooq naatsorsuutit tunngavigalugit inerniliussisinnaanani.

- Ingerlatseqatigiiffiup naatsorsuutai ukiumi matumani siulianilu amigartooruteqarfiusumik ingerlanneqarpoq, taamaammat pisariaqarsimavoq suliffeqarfiup aningaasartuutaannut naatsorsuutai, sanaartukkanik uninngasuuteqarneranut allattorsimaffiit, aningaasaqarnermut allattorsimaffik siunissamilu aningaasaliisoqarnissaanut kiisalu ingerlatsinissamut pilersaarutai pillugit piumasaqarnissarput. Allattorsimaffiit tigorusutagut pisinnaasimannginnatsigit ingerlatseqatigiiffiup “umiarsuaatai” kiisalu “illuutit, ingerlatsinermut atortut pisattallu” ingerlatsiviup pisuussutaasa ataanniittut 6.482.000 koruuninik naleqartutut nangaassuteqarluta naatsorsorpagut, naalagaaffimmit akuerisaasumik naatsorsuuserisoq Kenneth Bach Holmegaard Næstvedimi Multi Revisionimeersoq allappoq.

Nassuiaanerli tamaannga killinngilaq.

- Naatsorsuuserinitsinni naammattunik atorsinnaasunillu naatsorsuutitut uppernarsaatinik uunga tunngassuteqartunik pissarsisinnaasimanngilagut:

”Akiitsut allat” piffissami sivisuumi akiitsunut tunngassuteqartut. Tassunga tunngatillugu nangaassuteqarluta naatsorsuusiorpugut, 1.546.000 koruuninik aningaasartaqartoq allallugu.

”Ingerlatseqatigiiffimmi peqataasunut akiitsut”. Tassunga tunngatillugu nangaassuteqarluta naatsorsuummik tunniussivugut, 8.033.000 koruuninik aningaasartumik.

Naatsorsuuserisoq inatsi alla malillugu nalunaaruteqarpoq:

Ingerlatseqatigiiffik a-skatimut eqqortumik piffissarlu eqqorlugu tunniussisimanngilaq, aqutsisullu tassunga akisussaatinneqarsinnaapput.

Ingerlatseqatigiiffiup nammineerluni nalunaarsuinerit piffissaq eqqorlugu Namminersornerullutik Oqartussanut tunniussimanngilaat, aqutsisullu tassunga akisussaatinneqarsinnaapput.

Ingerlatseqatigiiffiup naatsorsuutinik allattuinermut inatsisimi piumasaqaatigineqartoq malissimanngilaa, tassa naatsorsuutinik allattuineq torersumik, ingerlatseqatigiiffiullu annertussusaanut tulluuttumik ingerlanneqassasoq. Naatsorsuutinik allattuinermut inatsisip unioqqutinneqarsimaneranut aqutsisut akisussaatinneqarsinnaapput.

Naatsorsuuserisoq ilisimatitsivoq “ingerlatseqatigiiffiup ingerlaqqinnissaa qularnaateqartoq”.

Aqutsisulli ilisimatitsipput “naliliillutik aningaasaliissutit tunniunneqarsimasut suli atorneqarsinnaasut”.

Kukkunerit

Aqutsisut nassuiaataanni ima nalunaarsorneqarsimasumi “Kukkunerit” ilisimatitsissutigineqarpoq aqutsisoqarfik “ilisimasaqalersimasoq 2017-imut naatsorsuutinut tunngatillugu ingerlatseqatigiiffiup umiarsuaatai kukkuneq aallaavigalugu 2.466.000 koruuninik naleqartutut naatsorsorneqarsimasut”. Kukkunerup naleqqataanik “pisiortorfimmut akiitsut” nalunaarsorneqarsimapput.

Naatsorssutit 8. maj 2019-imeersut naapertorlugit allassimavoq Kim Høegh-Dam pisortaqarfimmiittoq kiisalu Bitten Høegh-Dam aamma Bertel Kristensen peqatigalugit siulersuisuniilluni. Tamanna isumaqarpoq siorna naatsorsuutit tunniunneqareerneranniit maannamut piffissap ingerlanerani Bitten Høegh-Damip pisortatut atorfik uiminut tunniussimagaa.