Høegh-Damip aalisariutaataa aalisarnissamut itigartinneqartoq

Iluliaq Seafood Kim Høegh-Damimit pilersinneqarsimasoq, aalisariummik assortuussutaasumik Kalaallit Nunaata imartaani aalisarnissamut Aalisarnermut Naalakkersuisoqarfimmit itigartinneqarsimavoq

Fiskerfartøjet "Matilda" har tidligere heddet "Anita", hvor en sømand omkom under fiskeri.

Kim Høegh-Dam ningittagarsuut ”Narluneq” Qaqortup eqqaani septembarimi umiiarmalli aammaarluni ingerlatseqatigiiffik Iluliaq Seafood aqqutigalugulu unammillerneqaqqippoq.

Spaniamiut Iluliaq Seafood A/S-imik piginneqataalersut nutaat ikiorsiullugit aalisariut ”Matilda” Kalaallit Nunaat imartaani aalisartinniarlugu akuersissummik qinnuteqarsimagaluarpoq.

Angallat tusaamanerlutaq

Paasinarsisimavormi ”Matilda” qaammatialunnguit matuma siorna ”Anita”-mik taaguuteqarsimasoq, ajutoortoqarnerata Savalimmiuni tusgassiorfinnit salliullugu sammineqangaatsiarsimasup kingorna, tamalaanik atugaqarsimavoq.

- Naalakkersuisoqarfimmit naliliisimaneq naapertorlugu, aalisariut aalisarnissamut qinnutigineqartoq Kalaallit Nunaanni aningaasarsiutigalugu aalisariutigineqarnissaanut angivallaarpoq, Namminersorlutik Oqartussani Aalisarnermut Naalakkersuisoqarfik Sermitsiaq.AGg-mut ilisimatitsivoq.

Inuup inuuneranik nalililimmik ajutoortoqarsimasoq

Aalisariutip ”Anita”-mik taaguuteqarnerata nalaani inuup inuuneranik nalilimmik ajutoortoqarsimaneranut atatillugu Savalimmiuni aalisariummik aatsaat taamak sammisaqartoqarsimatigaaq. Aalisarnerup nalaani angut Indonisiamiu angallatip qassutaanut naapilluni avammut nusunneqarmat ajorluinnartumik pisoqarsimavoq. Angut ujaarineqartuaraluarami nassaarineqanngisaannarpoq.

Savalimmiuni oqartussat ajunaartoqarmat angallammik angallatillu akuersissutaanik misissuilermata paasinarsisimavoq,aalisarnissamut akuersissutinut piumasaqaatit inuttaqarnissamullu malittarisassat unioqqutinneqarsimasut. Angallammut tunngatillugu oqartussaasut unnerluutigineqarsimapput, ukiullu pingasut eqqartuussisoqareersoq pineqaatissiisoqarlunilu akiligassiisoqarpoq.

Aalisariut taamanikkut Worldwide Fishing Company-mit Spaniameersumit pigineqarpoq, tassannga piginnittut iluliaq Seafoodimik aningaasaqarnikkut ingerlanerluttumik 50 procentimik qaammatialunnguit matuma siorna piginneqataalerput, Kim Høegh-Dam sinneruttunik piginnittuuvoq.

Aasaru kalinneqassasoq

Avatangiisinut Naalakkersuisoqarfiup Sermitsiaq.AG-mut ilisimatitsissutigaa, ningittagarsuut umiiarnikoq, ”Narluneq”, tulliani aasarpat aatsaat kalillugu nunamukaanneqarsinnaasoq.

Avatangiisinut ajoqusiisinnaasut tamarmik, soorlu dieselolie, angallammiit peerneqareerput, taamaalilluni imaani mingutsitsisoqarsinnaanera pinngitsoortinneqarluni.

Powered by Labrador CMS