Høegh-Damikkut meeraat qinigaalluartut

Ippassaq qinersisoqarnerani ilaqutariit Høegh-Damikkut Folketingimi, Inatsisartuni kommunalbestyrelsimilu ilaasortanngortunik pingasunik qitornaqarneq ajugaassutigilluarpaat.

Aki-Mathilda Høegh-Dam kingullermik folketingimut qinersisoqarmat qinigaalluarluni Christiansborgimut iserpoq. Ippassaq aamma qinersisoqarmat taassuma qatanngutai Qarosq aamma Minik Høegh-Dam Inatsisartunut Avannaatalu Kommuniani kommunalbestyrelsimut qinigaapput.

Qarsoq Høegh-Dam 796-inik taaguunneqarluni Inatsiasartunut qinigaavoq, taamalu Kim Kielsenimut, Erik Jensenimut aamma Aslak Vilhelm Jensenimut inorsalaarluni taaguunneqarnerpaani normu 4-nngorluni.

Borgmesterimit taaguunneqarnerusoq

Avannaata Kommuniani Minik Høegh-Dam kommunalbestyrelsimut qinigaannginnanngilaq, aammali Siumut sinnerlugu borgmesteriusumit Palle Jerimiassenimit taaguunneqarnerusimavoq. Tassa Minik 406-inik taaguunneqarsimasoq, Palle Jerimiassen 338-nik taaguunneqarsimavoq.

Siullermeerlutik qinigassanngortittut taakku marluullutik qineqqusaarnerminni inuit attaveqaqatigiittarfiinik atusarsimanertik iluaqutigisimavaat. Qineqqusaarnerummi nalaani erseqqissumik takuneqarsinnaasarpoq, attaveqaqatigiittarfitsigut saqqummiussaat "liked" atorlugu akuersaarneqartarsimanerat.

Angajoqqaat iluatsitsivallaanngitsut

Meeqqat angutaat Kim Høegh-Dam 2018-imi partii Naleraq sinnerlugu Inatsisartunut qinigassanngortikkaluarpoq - iluatsinnaguli. Aamma anaanaasoq Bitten Høegh-Dam 2017-imi Sermersuumi kommunalbestyrelsimut qinigassanngortikkaluarami qinigaanngitsoorpoq.

Aki-Matilda Høegh-Dam kingullermik folketingimut qineqqusaarami 3.475-inik taaguunneqarsimavoq – parteeqatiminit Jens-Erik Kirkegaardimit 2000-it sinnerlugit taaguunneqarnerulluni.

Powered by Labrador CMS