HIV-mik tunillaanerit nutaat ernumatitsipput

Kalaallit Nunaanni inuusuttut marluk HIV-virusimik nassaarfigineqarput.

Nunatsinni nakorsaaneq Henrik Trykker, HIV-mik tunillatsissimasut inuusuttuunerat ernumassutigaa.

- Manna tikillugu HIV-mik tunillatsittartut utoqqasaajunerusarsimapput. Tunillatsissimasut nutaat taakku marluk, HIV-ip inuusuttut akornanni tuniluutilersinnaanera navianarnerulersippaa, Nunatsinni nakorsaaneq oqarpoq.

Atuaruk: Nappaatipiluit Nunatsinni atugaasorujussuanngoqqipput

Usuup puua atoruk
Nakorsaanerup kikkut tamaasa usuup puuanik atuinikkut imminnut illersorsinnaaqqullugit kajumissaarpai.

- Innutaasut sillimmarterlutik usuup puuanik atuinikkut imminnut illersorsinnaaqqullugit, pisup ammasumik avammut nalunaarutiginissaa toqqarparpput, Nunatsinni nakorsaaneq oqarpoq.

Atuaruk: Syfilisip atugaanersua Dorisip tupassutigaa

Ukkassilluni iliuuseqarneq
Ataatsimut isigalugu maani Nunatsinni siniffimmi illersornissatsinnut pikkoriffigivallaanngilarput.

- Nunatsinni peqqinnartumik atoqatigiittarnissap anguniarnissaanut annertuumik unammilligassaqarpugut. Kinguaassiuutitigut nappaatit annertuumik atugaanerat naartuersittartullu amerlanerujussuat, tamatuma ilaatigut takussutissartaraa, nakorsaaneq erseqqissaavoq.

Taamaattumik ajornartorsiut anigorneqassappat ukkassilluni pisortaqarfiit akimorlugit iliuuseqartariaqartoq taanna isumaqarpoq.

HIV-mik tunillaasoqarneranik iliuutsit
- Peqqinnarnerusumik atoqatigiittarnissamut suleqataasinnaasut amerlaqaagut, minnerunngitsumik inuusuttut namminneq, angajoqaat, atuarfiit kommunit peqqinnissaqarfillu, Henrik Trykker erseqqissaavoq.

Inuk HIV-mik tunillatsissimasoq paasineqaraangat, atoqatigisimasat tunillatsissimasinnaanermut misissortissinnaaqqullugit, peqqinnissaqarfimmit paasiniaaneq aallartittarpoq.

Atuaruk: Nakorsat mianersoqqusipput: Usuup-puua atornagu atoqatigiittarneq unitsinneqarli