Herstedvesterimit qanoq amerlatigisut nuunnissaat nalunartoq
Kalaallit tallimat 27-usunit Herstedvesterimiittut qularnanngitsumik pineqaatissinneqarsimasut inissiisarfiannut nutaamut nuunniarput.
(Inissiisarfimmut nutaamut qanoq amerlatigisut nuukkumaarnersut suli nalunartoq, Kalaallit Nunaanni Pinerluttunut Isumaginnittut oqaluttuaraat. Tamanna aaqqiissuteqarfigineqarpoq. Allaaserisap malitsissaa saqqummilerpoq.)
Ukiut hunnorujut affaanni Nunatsinni pinerluttut qussalaallisut Danmarkimi Herstedvesterimi paarnaarunneqartarput.
Taamatullu aaqqiissuteqarneq aamma ukiuni taama amerlatigipajaartuni isornartorsiorneqarluni, kalaallit marloriaammik pillarneqartutut oqariartuuteqartoqartarpoq. Paarnaarussaaqqanerup saniatigut – amerlasuut piffissaligaanngitsumi – najukkaminnit, oqaatsiminnit ilaquttaminniillu tusintilikkaanik ungasissusilimmut aallartinneqartarput.
Nuummi inissiisarfiup tamanna aaqqiivigisussaavaa. Nuummi maajip aallaqqaataani atoqqaarfissiorneqarpat, kalaallit Danmarkimi paarnaarunneqartarunnaassapput.
Kisianni maanna paarnaarussat kalaallit 27-usunit tallimaannaat nuunneqarnissaminnut aalajangereersimapput.
Sinnerisa Danmarkimiiginnarnissartik orniginartinneruaat, Thomas Fredhøj, pineqaatissiissutit naammassinissaannut isumannartuunissamullu pisortaq ilisimatitsivoq. Nuussinissamut inatsisip inissinnissaa taakku utaqqivaat.
- Immaqa qallunaat tungaannit kalaalliulluni Danmarkimi inissiisarfimmiikkaanni, taava piumasaqaatit apeqqutaatinnagit nuukkusuttoqarneranik eqqarsartoqarpoq. Kisianni taamaattoqanngilaq, Thomas Fredhøj oqarpoq.
Kalaallit Nunaat nammineq matoqqasumik inissiisarfeqartariaqartoq, Nunatsinni eqqartuussiveqarnermut ataatsimiititaliaata 2003-imi nalilerpaa.
Eqqartuussiviit qullersaanni eqqartuussisuusimasoq Per Walsøe ataatsimiititaliami siulittaasuusimavoq. Inissinneqarsimasut nalorninerat taassuma paasisinnaavaa, taakku illoqarfinniit aamma nunaqarfinniit Nuummit ungasissumeersuupput.
- Kalaallit Nunaat nunarujussuuvoq, ilaquttat Upernavimmi imaluunniit Tasiilami najugaqarpata, Nuummi inissiisarfimmiinneq qanoq iluaqutaassagami, Per Walsøe oqarpoq.
Inissiisarfik ukiorpassuanngortuni kiisami piviusunngornerata nuannaarutaanera, ajoqutit amerlanngitsut qallissanngilaat.
- Pineqaatissinneqartunik Danmarkimut immaqa aallartitsisoqartarunnaarniarnera pingaarnersaavoq, taanna oqarpoq.
Kalaallit Nunaanni Pinerluttunik Isumaginnittut naapertorlugit – isorartussutsit saniatigut – amerlanngitsut Nunatsinni ilaquttaminnut attaveqarunnaarsimanertik pissutigalugu nalornipput.
Allat tarnimikkut katsorsarneqarnerminni imaluunniit nakorsaasersorneqarnertik nangissinnaanerlugu nalornissutigaat. Ilaatigut kinguaassiutitigut pinerluuteqarsimasut ullumikkut tissattarnerannik annikillisaataasumik nakorsaateqartut tassani pineqarput.
Folketingingip 2009-mi inissiisarfiup nutaap sananeqarnissaata aalajangerneqarnerani Morten Bødskov (S) justitsministeriuvoq. Taassuma taama ikitsigisut nuunneqarnissaminnik aalajangersimanerat tupaallaatiginngilaa.
- Soorunami amerlanerunissaat neriuutigisimagaluarpara. Kisianni amerlanerit paasisinnaavakka, 4.000 kilometerinik ungasitsigisumiikkaanni nutaanik attaveqaatitaartoqartarpoq, najukkamilu inuiaqatit qimanneqartarlutik, Morten Bødskov oqarpoq.