Herstedvesterimi pineqaatissinneqarlutik inissinneqarsimasut kalaaliminertorsinnaaginnassapput
Nuummi pineqaatissinneqarsimallutik inissiisarfik nutaaq ammarpat, Herstedvesterimi pineqaatissinneqarsimallutik inissinneqarsimasut nuukkusunngikkunik, kalaaliminertorsinnaallutillu kalaallisut suli ilinniartinneqarsinnaassapput.
Herstedvesterimiittut kalaallit ilaat Nuummut nuukkaluarpataluunniit, pineqaatissinneqarlutik inissinneqarsimanngitsut nuunnginnissamik aalajangertut suli kalaaliminertorsinnaassapput.
Kalaallit Nunaat pillugu ataatsimiititaliami ilaasortaasut partiineersut S, DF, EL, ALT, RV, SF, IA aamma NQ taama siunniussaqarput.
Namminersorlutik Oqartussat Eqqartuussissuserinermillu siunnersuisoqatigiit, Nuummi pineqaatissinneqarsimasut inissiisarfiup ammarnerani Herstedvesterimiit nuunnianngitsunut kalaallinut kalaaliminertortitsisarnerup kalaallisullu ilinniartinneqartarnerup attatiinnarnissaanik innersuussipput.
Neqeroorutigineqartut attanneqaannarnissaannut, IA-p folketingimi ilaasortaatitaata Aaja Chemnitz Larsenip, ataatsimiititaliami tunngavilersuutigisimavaa.
Kalaallit Nunaanniilli ilaqutaasut tikeraarniartut akiliunneqartarnerat, Kalaallit Nunaannullu akiliutsilluni ingiaqateqartitsillunilu angalanerit periarfissaajunnaassapput, Folketingimi amerlanerussuteqartut atorunnaarsitsissallutik aalajangiusimammata.
Inatsisissatut siunnersuut Folketingimi ullumi oqaluuserineqassaaq. Inatsisinik atuutsitsinermut ministerip inatsisissatut siunnersuut allanngortereernikuuaa, Nuummut nuussallutik aalajangertut kingusinnerusukkut peqqissimisinnaanissamik periarfissillugit, taamaasillutik Herstedvesterimut uternissamut periarfissaqartilerlugit.