Hermann Berthelsen: Siumup politikkia ersarinnerusariaqarpoq
Siumut Inatsisartut gruppiani oqaaseqartartup erseqqissaatigaa naalakkersuisoqatigiinni partiip Siumup politikkikkut anguniagai ersarinnerusariaqartut. Tamanna 36-nik allannguutissatut siunnersuuteqarnermikkut naqissuserpaat. Aningaasalersorneqarnissaallu partiinut allanut isumaqatiginninniarnikkut ilaatigut qulakkeerneqassapput.
Sinerissami pilattorpalaaq kaatarpalaarlu tusaaneqarnerusariaqarpoq. Siumut Inatsisartuni gruppiani oqaaseqartartoq taama isumaqarpoq. 2020-mut aningaasanut inatsisissatut siunnersuut marlunngornermi septemberip 24-ani siullermeerlugu oqaluuserineqarmat, Siumut gruppia 36-nik allannguutissatut siunnersuutinik saqqummiussaqarpoq.
Nunaqarfiit napparsimmaveeraqanngitsut sanaartorfigineqartariaqarput. Illoqarfiit mikinerusut mittarfeeraliorfigineqarnissaannut aningaasat nassaarineqartariaqarput, Tasiilarlu meeqqanut angerlarsimaffimmik nutaamik sanaartorfiussalluni.
Partiip politikkia ersarinnerusariaqarpoq
2020-mut aningaasanut inatsisissatut siunnersuummut kissaaterpassuit pillugit Sermitsiaq.ag apeqquteqarpoq:
- Siunnersuummut oqaaseqaatigisassinni ilanngullugu oqaatigivat "kissaatisi taama amerlatigimmata immaqa ilaannit ingasagineqarsinnaagaluartoq", kisianni parteersi naalakkersuisoqatigiinni partiini anginerpaammat piumasaqaatigisasi siunnersuuteqartoqannginnerani sooq ilanngutsissinnaasimanngilisigit?
- llumoorputit Siumut Naalakkersuisunut peqataavoq. Taamaakkaluartorli isumaqarpugut Siumup partiitut anguniagai saqqumminerusariaqrtut. Imaattariaqanngimmat Naalakkersuisut isumai Siumumiit maliinnartassagigut, Hermann Berthelsen (S) akissuteqarpoq.
- Kissaatisi 36-iupput, taakkunannga pingasuinnaat aningaasanut inatsisissatut siunnersuummut ilanngussinnaagussigit sorliussagaluarpat?
- Oqaaseqarninni pingaartippara partiit allat oqaloqatigilluaqqaarlugit anguniakkatta piviusunngortitassat tulleriissaarneqarnissaat. Partiit assigiinngikkaluarlutik amerlasuutigut anguniagaqartarmata assigiikannersinnaasunik. Taamaammat tamatta isummatta teqeqquisa pilattulaarnerisigut anguniagaq pitsaanerpaamik amerlanerpaanillu tunuliaqutaqarluni piviusunngortinnissaa anguneqarsinnaammat.
- Allanngortikkumasasi ilanngukkumasasilu tamakkerlugit qanoq akeqassanersut naatsorsorsimagussiuk, qanoq naleqarpat?
- Oqaaseqarnitsinni pingaartipparput siullermik isummagut allanit isumaqatigineqarnersut paasissallugit aamma imaanngilaq tamarmik ukioq manna aallartinneqassasut, ilaasali ukiuni tulliuttuni sananeqarnissaat periarfissaqassaaq. Malugineqassaaq ilai siusinnerusukkut Inatsisartunit tunngavimmikkut akuerineqareernikuummata. Taamaammallu nutaajunatik. Qanoq akeqassanersut isumaqatigiinniarnerup kingorna paasinarsiumaarpoq.
- Isumaqatiginninniarnissaq eqqarsaatigalugu piumasassi aningaasanut inatsisissamut siunnersuummut ilanngunneqarnissaat anguniarlugu aningaasat suminngaanniit aaneqarnissaannut piareersaateqarpisi? - aningaasat suminngaanniit aaneqassappat?
- Soorunami siunnersuutit partiit allat isumaqatigalugit aalajangiussassagut aningaasassaqartussaapput. Isumaqarpugut tassani saqqummiussatta iluini ilai takuneqarsinnaapput. Ilaatigut makkuninngaanit tiguneqarsinnaapput: Siunnersortinut atukkat ikilisarnerisigut, allaffissornerit annikinnerulernerisigut allallu kingusinnerusukkut oqaloqatigiilluareernerup kingorna saqqummiussassagut, Hermann Berthelsen naggasiivoq.