Hermann Berthelsen: Politikkimi kinguaariit tullii inissaqartittariaqarpagut
Sisimiuni borgmesteriusimasoq Inatsisartunilu aningaasaqarnermut ataatsimiititaliami siulittaasuusimasoq, Hermann Berthelsen politikkimik suliaqarunnaarpoq. Suliat suulluunniit aamma killeqartarput, oqarpoq. Politikerit nuimasimasut arlallit aamma qinigassanngorteqqinngillat.
Kommunimi Inatsisartunilu politikeri misilittagaqarluartoq, Hermann Berthelsen maanna Sisimiuniippoq. Inatsisartuni kommunimiluunniit politikkimik suliaqaqqinnissamut sassarsimanngilaq.
- Qinigassanngorteqqinngilanga isumaqarama inuusunnerusut qinigassanngortittullu nutaat periarfissinneqartariaqartut. Politikkimik suliaqartutut pisussaaffigaarput tusaamasaanerinnaq aallaavigalugu qineqqusaannginnissarput, nutaat kivitsisussatut periarfissittariaqaratsigit, Hermann Berthelsen oqarpoq.
Siumut sinnerlugu politikeriusoq 65-inik ukioqaleqqammerpoq. Politikkimik suliaqarnermini Sisimiut Kommuniani kommunalbestyrelsemi ilaasortaasarsimavoq borgmesteriusimallunilu. Inatsisartunut qinigaaffimmi kingullermi aningaasaqarnermut akileraartarnermullu ataatsimiititaliami siulittaasuusimavoq.
- Suliat tamarmik killiffeqartarput. Aamma politikkimik sulinermi imminut killilersinnaanissaq pisariaqartarpoq. Killissara tikillugu politikkimik suliaqarniinnarnissamik siunertaqarsimanngisaannarpunga, oqarpoq.
Piareersaaneq pingaaruteqarpoq
Hermann Berthelsen politikerini nuimanerusuni kisimiinngilaq Inatsisartunut qinigassanngorteqqinngitsoq.
Naalakkersuisuni Inatsisartunilu qinigaaffimmi kingullermi ilaasortaasimasut ilaat qinigassanngortinngillat.
Ilaatigut:
- Karl Kristian Kruse
- Ane Lone Bagger
- Jens Danielsen
- Katti Frederiksen
- Jens Immanuelsen
- Hermann berthelsen
- Martha Abelsen
- Simon Simonsen
Inatsisartuni aningaasaqarnermut akileraartarnermullu ataatsimiititaliami siulittaasuusimasoq erseqqissaavoq kinguaariit nikittarnerat sulinermi pingaaruteqarluinnartoq. Ilanngullugu nassuiaavoq inuusuttut ilaasortat kivitsisussatut tullertut piareersarneqartarnerat Siumumi pikkoriffigineqartoq:
- Soorunami neriuppunga sulilluassasut. Uagut iluatsilluartumik kinguaariit tulliinik politikkikkut suliaqarusuttunik piareersaasarpugut, taamaasilluta sulisussanik tullissaqartuaannarluta, Hermann Berthelsen oqarpoq.
Qununak piumassuseqarit
Hermann Berthelsenip politikerit tullinnguullutik sulisussat siunnersorpai politikerit misilittagaqarnerusut nipitunerugaluarpataluunniit qunuginagit akisinnaaqqullugit. Ilanngullugu naqissuserpaa politikkikkut sulinermi suleqatigiinnerup pingaaruteqassusia.
- Pingaarnerpaavoq suleqatigiissinnaaneq, suliallu ilaanni naaperiaasinnaaneq. Kikkulluunniit kisermaassillutik naalakkersuisutut inississinnaanngillat, suleqatigiinneq pisariaqarpoq. Kimigiiserluni kisermaassiniaraanni allanullu tusarnaarsinnaanngikkaanni, taava tamanna nunatta ineriartorneranik unittoortitseratarsinnaavoq, Hermann Berthelsen naggasiivoq.
Partiit Innatsisartuni ilaasortaatitarisimasaat kingulliit tamarmik Inatsisartunut qinersinermi qinigassanngorteqqipput. Qinigassanngortittut ataasiakkaat kingullermit partii alla tunuliaqutaralugu sassarput. Soorlu Aqqaluk Heilmann, Atassummi ilaasortaasimasoq.