Henrik Sandgreen: Pisut meerarpaluppallaarput
Siulittaasujunnaartup Henrik Sandgreenip KNAPk-p qanittukkut ataatsimeersuarnerata kinguneri tupaallaatiginngilai, tassani Nikkulaat Jeremiassen siulittaasunngorpoq. Siulersuisunngortulli nutaat suleqatigeeriaasiat paasisinnaannginnerarpaa.
Henrik Sandgreenip ilaatigut Aalisarneq pillugu Ataatsimiititaliarsuup isumaliutissiissutaa piniartut aalisartullu kattuffianni KNAPK-mi siulittaasuujunnaarnerminut tunngaviusoq qularutiginngilaa.
Siumumilli aqunneqartumik uppisinneqarsimanerluni isumerfigerusunngilaa.
- Nalunngisatuara tassaavoq, Karl Kristian Kruse ataatsimeersuartoqanngilaattaani isertortumik ataatsimiisitsisimasoq, tassunga atatillugu ilaasortat arlallit oqaluttuarisimavaat, Nikkulaat Jeremiassen kattuffimmi siulittaasunngussasoq ilisimatinneqarsimallutik, Henrik Sandgreen Sermitsiaq.AG-mut oqarpoq.
Ataatsimeersuarnermi Piniarnermut Aalisarnermullu Naalakkersuisuusimasoq Nikkulaat Jeremiassen (S) siulittaasussatut nutaatut toqqarneqarpoq, Inatsisartunilu ilaasortaq Aslak Jensen Siumumeersoq siulittaasup tulliatut toqqarneqarluni.
- Tamanna aaqqissuussimavaat, pilersaarutit naggaterpiaa tikillugu isertuussaallutik. Inuussutissarsiorneq politikkilu maanna akuleriisinneqarput. Taamalu ajutuuittoqassalluni, tamannami siusinnerusukkut takusareerparput, Henrik Sandgreen oqarpoq.
Henrik Sandgreenip oqaluttuaraa, siulittaasunngorlaaq oqaloqatigilaarsimallugu, ajunngitsumillu tunniussinissaq iluamik oqaloqatigiissutigisimanngilaat.
- Siulittaasuujunnaarsikkusussimappannga ajoriffissaqartinngilara, siulersuilli nutaat ilaasortaasa arlaannaataluunniit oqaloqatigissallunga sapersimavaat. Sulimi ataatsimiititaliani ilaasortaavunga, taakkulu kattuffimmut attaveqarsinnaanngikkuma isumagisinnaanngilakka. Pissutsit taamatut ingerlanneqarnerat meerarpalulaarpoq.
Henrik Sandgreenip nassuerutigaa, siulersuisuni ilaasortat ilaat piffissami kingullermi angalasimasut, nipaannerannulli tamanna pissutaassasorinngilaa.
Suliap inerlateqqinnissaanut piareersimasoq
Henrik Sandgreenip KNAPK-mi ukiut arfineq-pingasut siulittaasooreerluni siulittaasuunini tassanngaannaq unitsinneqaraluartoq, aalisartut kattuffianni suli naammasseqqajarani erseqqissaassutigaa.
- Uanga oqaloqatigiittarneq aqqutissatut isigiuaannarpara, aamma isumaqatiginngisanut. Ineriartortitsinermut sanilliullugu ajoqusiinissaq ajornannginnerusuaannarpoq, neriuutigaarali siulittaasunngorlaap aalisarnerup aningaasatigut imminut napatinnissaanuk suliaqarneq ingerlateqqissagaa aamma Aaklisarneq pillugu Ataatsimiititaliarsuup isumaqaliutissiissutaa malillugu suliaqarneq ingerlateqqissagaa.
Henrik Sandgreenip erseqqissaassutigalugu oqaatigaa, KNAPK-mi maanna siulittaasuunngikkaluarluni ilaasortaaffigilikkamini suliap ingerlateqqinneqarnissaaanut piareersimalluni.
- Kattuffimmi arlaata uannit ikiorneqarnissani pisariaqartissappagu piareersimavunga. Pisulli matuma qaangernissaanut piffissaqarnissara pisariaqartippara. Aamma suliffinnut atatillugu inigisamma qaammat ataaseq qaangiuppat qimannissaanut piareersaleruttoratta, Henrik Sandgreen naggasiivoq.
Sermitsiaq.AG-mit siulersuisut nutaat pisoq pillugu oqaaseqartinniarsarineqarput.