Henrik Fleischer tapiiffigineqaqqittoq
Siumumeersoq Henrik Fleischer, Inatsisartuni ataatsimiititaliat qitiusumi inissisimasut ilaannut, Aalisarnermut, Piniarnermut Nunalerinermullu Ataatsiimiititaliamut, siulittaasuusoq, aalisariummik nutaamik pisinissamut 732.000 koruuninik ta piiffigineqarsimavoq.
Aningaasat Namminersorlutik Oqartussani Aalisarnermut Aningaasaliissutinut Immikkoortitanit, piffissami kingullermi sammineqangaatsiartumit, pisuupput.
Henrik Fleischer Aalisarnermut Aningaasaliissutinut Immikkoortitanit aappassaa tapiissutinik pissarsivoq. 2016-imi Poca 770-mut, kingornat unisaminut, 197.000 koruuninik tapiiffigineqarpoq.
Aningaasaliissutinut immikkoortitat 2006-imiilli aningaasanut inatsimmiilersimapput taakkua Aalisarnermut, Piniarnermut Nunalerinermullu Naalakkersuisoqarfimmit aqutarineqarlutik. Qinnuteqaatit tamarmik tassani suliarineqarlutillu aalajangiivigineqartarput.
Henrik Fleischerip tapiissutisiai kingulliit 731.620 koruuniupput, taakkualu Aalisarnermut, Piniarnermut Nunalerinermullu Naalakkersuisoqarfimmit, APNN-imit, ukioq manna maajip 27-ani inuttaanut tunniunneqarlutik.
Tamanna mailimi Sermitsiap septembarip 24-ani naalakkersuisoqarfimmit tigusimasaani atuarneqarsinnaavoq, taannalu Inatsisartunut ilaasortat Henrik Fleischer, Karl-Kristian Kruse aamma Nikkulaat Jeremiassen pillugit Aalisarnermut Aningaasaliissutinit Immikkoortitanut atatillugu allagaatinik takunnissinnaatitaanerup aviisip septembarip 5-ani pissarsiarisimasaata kingorna pissarsiarineqarsimavoq.
Sermitsiaq septembarip 11-ani allappoq, Henrik Fleischerip umiatsiamik nutaamik pisinissamut 732.000 koruuningajannik qinnuteqaataa naalakkersuisoqarfimmit suli naammassillugu suliarineqarsimanngitsoq.
Kisianni naammassineqareersimasoq paasinarsivoq, suliaq upernaarli aalajangiivigineqareersimammat. »Ajuusaarnartumik kukkusoqarneratigut neriorsuut ilanngullugu nassiunneqartoq 2020-meersoq (731.620 kr., aaqq.) allakkianut siusinnerusukkut nassiunneqartunut ilanngutinngitsoorneqarsimavoq, maannalu nassiunneqarluni,« inatsisileritooq Thomas Rassing Aalisarnermut, Piniarnermut Nunalerinermullu Naalakkersuisoqarfik, Sermitsiap allagaatinik takunnissinnaatitaanermik qinnuteqaataanik suliarinnissimasoq, sinnerlugu allappoq.
Allaaserineqartoq aviisimi Sermitsiami tamakkiisumik atuaruk. Aviisi uani pisiarineqarsinnaavoq: