Henrik Fleischer Siumumit anisitaasoq
Siumut allattoqarfia Inatsisartut siulittaasoqarfianut allakkiamik nassiussisimavoq, Henrik Fleischerip Siumumi ilaasortaajunnaarnera ilisimatitsissutigalugu. Sermitsiaq.AG-p tamanna tusarfinnit qitiusunit arlalinnit paasivaa.
Henrik Felischer nunatsinni partiit annersaanni, Siumumi, ilaasortaaginnarnissaminik maannakkorpiaq ilungersorluni suliniuteqarsorinarsinnaavoq.
Politikeri akerliliisinnaassuseqartoq, pingaartumik aalisarnermut ataatsimiititaliami siulittaasutut inissisimanermini Aalisarnermut Naalakkersuisumut, Jens Immanuelsenimut, tatiginnikkunnaarluni nalunaaruteqarnermini immikkut maluginiarneqarsimasoq, partiip siuttuinit anisitaasimasorineqarpoq.
Isumaqatigiinniartoqarpoq
Sermitsiaq.AG-mut Henrik Fleischer ima oqarpoq:
- Siumumut suli isumaqatiginninniarpunga. Paatsooqatigiittoqarsimavoq, Henrik Fleischer nassuiaavoq, erseqqissaassutigalugulu partiimiiginnarnissani kissaatigalugu.
- Aqagu annertunerusumik oqaluttuarsinnaanera naatsorsuutigaara, Henrik Fleischer oqarpoq, suliarlu pillugu annerusumik oqaaseqarumanani.
Vivian Motzfeldt imaluunniit Karl-Kristian Kruse suliamut tunngatillugu Sermitsiaq.AG-mut oqaaseqarumanngillat, taakku Kim Kielsen peqatigalugu partiimi siulersuisuunerniipput. Siumumi siulittaasoq, Kim Kielsen pissarsiarineqarsinnaasimanngilaq.
Uppernarsaaneq
Fleischerip anisitaanera Inatsisartut ganngiini arfininngormalli oqaluuserineqalersimavoq, pineqartullu Inatsisartuni ilaasortat allat ilaat nammineerluni ilisimatissimagai, Sermitsiaq.AG-p paasivaa.
Partiimi qullersat aalajangernerat pillugu partiimi siunnersorti Ineqi Kielsen Inatsisartut siulittaasoqarfiannut arfininngornermi ilisimatitsisimavoq.
Inatsisartunut qinersinermi 2018-imi aprilimi Henrik Fleischer Partii Naleraq tunuliaqutaralugu qinigaavoq. Sapaatit akunnerialuinnaalli qaangiummata Henrik Fleischer Siumumi ilaasortanngorpoq. Partiimut nuunneranut pissutaanerarneqarpoq Partii Naleqqamiinnermini pingaaruteqarsinnaasunik politikkikkut akisussaaffinnik tunineqannginnini iluarinngikkaa, tassami Partii Naleraq qinersereernermi Naalakkersuisoqatigiinni ilaalerpoq, september 2019-imili mittarfiit pillugit akerleriittoqarnerani illuatungiliuttunngorluni.