Heliportinngortitsineq timmisartuussinernut sunniuteqarnerlussaaq
Kangerlussuaq heliportitut atorneqalissappat nunatta ilaani timmisartuussinerit aalaakkaagunnaassapput. Ilulissani, Qaqortumi Nuummilu mittarfiliortiteraluarpata tamanna kingunerisussaavaa
Timmisartuussinikkut atortorissaarutit pitsaanerpaat atorneqaraluarpataluunniit timmisartuussinerit aalaakkaanerat allannguuteqassaaq. Tassami sumiiffiit ilaanni timmisartuussinerit allannguuteqassapput.
Kangerlussuaq heliportinngortinneqassappat timmisartuussinernut eqquisussaavoq, mittarfittut atorneqarunnaarpat timmisartuussinissaraluit taamaatittut kinguaattoortullu amerlanerulissapput.
Tassunga pissutaavoq timmisartumi aquttoq miffissamik allamik periarfissaqartariaqarpoq sila ajortissagaluarpat.
- Sila ajortikkaangat Kangerlussuaq atorneqarluartarpoq, silarluppiarnermi ajorpoq. Illoqarfiit allat silarlukulanerusarput naqitsiniisaffiit pissutaallutik, Air Greenlandip pisortaanera Jacob Nitter Sørensen Sermitsiaq.AG-mut oqarpoq.
Kisitsisit amigaataapput
Tassami silarlulissagaluarpat timmisartumi aquttoq marlunnik allanik miffiusinnaasunik miffissaqarsinnaasariaqarnissani aallannginnermi qulakkeeqqaartarpaa. Kangerlussuaq taamatut atorneqarluartartoq ilisimatitsissutigineqarpoq.
- Mittarfiit tallineqarpata nunanut allanut timmisartuussineranut iluaqutaassaaq, akerlianik Kalaallit Nunaata iluani timmisartuussinerit aalaakkaanerujunnaassapput, Jacob Nitter Sørensen naqissusiivoq.
Qanoq akuttutigisukkut timmisartuussinernik unitsitsiinnartoqartassanersoq kisitsisaateqanngilaq, silasiortut ilimasaarutaat timmisartuutileqatigiiffimmit malinneqartarmata.
Aalajangigassaq
Angalasut pingajorarterutaat nunanit allanit timmisartortuusarput, sinneri nunatsinneersuusarlutik. Kangerlussuaq heliportituinnaq atorneqalissappat ilaasussarpassuarnut kinguneqartussaasoq kisitsisit takutippaat.
- Nuummit Sisimiunut timmisartornermi sila allanngoriataarpat timmisartumi aquttup aalajangersinnaavaa Kulusumukassalluni. Tamanna peqqutigalugu ilaasut ilaat aallannginnermi timmisartoqataanngiinnartariaqarsinnaapput, timmisartup orsussaa eqqarsaatigisariaqarmat. Ilaasussanit tamanna qanoq isumaqarfigissaneraat eqqoriassallugu nalunanngilaq, Air Greenlandip pisortaanera oqarpoq.
500 million koruuninik nalilik
Nuummi mittarfik tallineqassappat atortorissaarutit pitsaanerpaat atorneqartussaapput, tamannalu timmisartuussinernut iluaqutaassaaq. Ilulissat silarlulissagaluarpat aamma toqqaruminarnerulissaaq.
Mittarfissanut suliaq 3,5 milliard koruuneqartussaavoq, Kangerlussuarmili iluarsaaqqinnissat aningaasat tassunga ilaatinneqanngillat. Mittarfittut atorneqaannassappat nunatta karsianut 500 million koruuninik naleqassaaq, Deloittep missingernikuuaa.
Kangerlussuaq heliportinngortinneqassasoq Demokraatit aalajangereerput, Kim Kielsenip oqariartuutigereerlugu Kangerlussuaq mittarfittut attatiinnarnissaa pingaaruteqartoq.