ansvar
Helene Thisen: Isumaginninnikkut ajornartorsiutit nammineq akisussaaffigaavut
– Ajuallattarpunga ataatsimut ajortumik isiginninniartoqaraangat, Helene Thiesen oqarpoq. taannalu amerlanerpaat ilisimavaat meeqqat 22-it ilaatut, 1951-imi peersinneqartut Danmarkimullu nuutsinneqarlutik
– Kalaallit Nunaata qeqertatut inuttut atugarliortuinnavinnik isigitinniarnera assigiinnarpaa oqarluni Danmarkimi kikkut tamarmik Christianiami inuunertut inuusut. Tamanna qallunaarpassuit ajuallaatigissavaat. Amerlanerpaat pitsaanerusumik atugaqarput ulloq taanna isumaliutersuummi allaaserineqartumit, Helene Thiesen oqarpoq.
Taassuma Information-imi isumaliutersuut "Inuiaqatigiit atugarliortut 4 milliardinut" akissuteqarfigaa, tassani Iben Rasmine Østergaard Marcussenip Helene Thiesenip isaanit isigalugu Kalaallit Nunaat ataatsimut isigitinniarmagu.
Rasmine Østergaard Marcussen ilaatigut allappoq:
"Kalaallit inuiaqatigiillu atugarliortut qanittukkut oqaluuserilinngikkutsigit ersissutigaara Kalaallit Nunaat isigiliinnassagipput silap pissusiata qanoq issusianut uuttuutitut".
Helene Thiesenip tupigusuutigaa Kalaallit Nunaat qallunaanit pitsaanngitsumik saqqummiunneqarnera, erseqqissarpaalu kalaallit atugarliuutaannut iliuuseqarsinnaasut kisimik tassaasut kalaallit.
Tassami kalaallit isumaginninnikkut ajornartorsiutaat qallunaat akisussaaffiginngilaat:
– Akisussaaffik kalaallit politikerit tigummivaat. Namminersorlutik Oqartussat pitsaanerusumik iliortariaqarput isumagalugulu innuttaasut ilinniagaqartinnissaat inuiaqatigiinnilu kikkut tamaasa isumagalugit. Tamatumunnga Danmarki akulerutsinniarneqarpat misigisimanarpoq nunasiaanermut utertutut, tamatumani qallunaat oqaasissaqartorujussuullutik. Isumaqarpunga tamanna kukkunerusoq, Helene Thiesen allappoq.
Helene Thiesenip Information--imi isumaliutersuutaa atuaruk uani