Heidi Bay kalaallinik aalborgimiittunik ikiuisarpoq
Kalaalleq "V" ukiuni marlunni sorsuuteqareersoq, Aalborgimi inigisaminiiginnarsinnaasoq eqqartuussivik aalajangiisimavoq, naak piginneqatigiit peqatigiiffiani anisinniarneqarsimagaluarluni. Kommunimi tapersersortaataa inissaanik nassaassussimavaa, tamannalu ajornaatsuinnaanngitsoq, oqaatigineqarpoq.
Inissarsiniarneq ajornaatsuinnaasanngilaq. Aqqusiniinnarmili najugaqaraanni inuttulluunniit allatut ajornartorsiuteqaraanni, inissiaatileqatigiiffimmut akileeriarluni utaqqisut allattorsimaffianiinnissaq oqitsuinnaasanngilaq.
- Ajornartorsiutaasoq tassaavoq, inissiaatileqatigiiffiit utaqqisunut allattorsimaffianniissagaanni 200 koruuninik akeqarnera. Naliginnaasumillu massakkorpiaq inissamik pisariaqartitsisoqartarluni, Heidi Bay Aalborgimi kommunip aqqusinermi sullissisuini kalaallinut atuisunut akisussaalluni tapersersuisuusoq oqarpoq.
Namminersortut ineqarfiutaat kisimik periarfissaasut
Taassuma amerlasuutigut namminersortutut attartortitsisartut kisiisa periarfissarisarpai, inissialli akisuallaanngitsut amerlavallaanngillat, taanna erseqqissaavoq.
- Inissiaatileqatigiiffiutivut mikisunik akikitsunillu inissiaateqanngillat. Aserfallatsaaliillutillu ininik allilerisarput, taamalu akisunerulersarlutik, taanna oqarpoq.
Heidi Bay maannakkorpiaq suliffeqarfinni namminersortuni marlunni sulivoq. Suliffeqarfiup aappa V-p najugaqarfigaa.
- Frank Nygaard mikisunik akikitsunillu inissiaateqarpoq, aammali iluatsitsilluta inuit ininik, igaffimmik uffarfimmillu ataatsimoorussiffiusartunik, attartortitsisarut pissarsiarisinnaasarpavut, taanna oqapoq.
Suliaq issuaanermut tunngaviusinnaasoq
V pillugu suliaq eqqartuussivimmi ukiuni marlunni suliarineqarpoq, qanittukkullu V-mut iluaqutaasumik inerneqarluni, tamanna Frank Nygaardip nuannaarutigaa. Taasumammi annilaanngatigisimasaa, suliap issuaaanermut tunngaviliisinnaannera.
- Piginneqatigiit peqatigiiffiat V-mut tunngatillugu suliami ajugaasimasuuguni, kalaallit attartortikka tamaasa anisinniarsarissagaluarpaat, taakkumi isumaqarput kalaallit tassani najugaqarnerat ingerlatsinermut ajoqutaasut, taanna oqarpoq.
Heidi Bayip nassuerutigaa, innuttaasut ilaat ilaannikkooriarlutik unammillernarsinnaasartut, erseqqissaatigaali Revlingebakkenimi tamanna nalinginnaasuusoq. Tassa apeqqutaanani attartortut suminngaanneersuunersut.