Hashinik 100-t missaanniittunik iioraasimasoq unitsinneqartoq
Angut marlunngornermi Kangerlussuarmi hashimik iioraasimalluni eqqusseriaraluartoq tigusarineqarpoq.
Marlunngornermi ullaap tungaani nal. 11.10 angut 46-nik ukiulik Kangerlussuarmi tigusarineqarpoq, timaani hasheqarnera pissutigalugu – tassa iioraasimammat.
Angut Sisimiunut angalasuusoq, pigaartut pisortaat Bruno Brix oqaluttuarpoq.
Angut tikiffissaanut angalatinnagu Nuummut angallanneqarpoq, tassanilu tarrarsortilluni assilineqarpoq, ikiaroornartut qanoq amerlatigisut timaaniinnersut paasiniarneqassammat.
Pigaartut pisortaata oqarnera naapertorlugu, angutip timaani hashit mikisunngorlugit poortorneqarsimasut 100-t missaanniipput.
Eqqartuussivimmi sassartinneqassasoq
46-nik ukiullip tigummigallarneqarnissaa siunertaralugu eqqartuussivimmi sassartinneqarnissaa naatsorsuutigineqarpoq, poortorneqarsimasut tamarmik timaanit anissappata ullut arlallit ingerlasinnaanerat pissutigalugu.
Hashi annertooq pineqarmat, angut tuniniaaqqinnissamik siunertaqarluni eqqusseriarsimasutut unnerluutigineqarnissaa politiit naatsorsuutigaat.
Inuit aanngajaarniutinik iioraallutik eqqussisarnerannut politiit siornatigut aarlerisaaruteqarnikuupput. Siorna inuit pingasut aanngajaarniutinik iioraallutik eqqussinerminni toqupput.
