Hashimik eqqussuineq: Hashi 12 kiilu RAL-ip umiarsuaata sinaani toqqorneqarsimasoq
Hashi tuniniarneqaruni 6 milliuunit koruuninik akeqartussaq, Nuummi umiarsualivimmut tikiunneqartoq, novembarimi politiinit nassaarineqarluni arsaarinnissutigineqarpoq. Taanna RAL-ip umiarsuaani Tukuma Arcticami nassaarineqarpoq.
Hashi assigiinngitsorpassuartigut anngiortumik eqqunneqartarpoq. Piffissami kingullermi pingaartumik inuit hashimik imaluunniit aanngajaarniutinik allanik iioraallutik eqqusseriartartut politiit suliaanni takussaapput.
Periutsit allat ilisimaneqarnerusut ilisimaneqannginnerusulluunniit tassaapput hashimik pisattanut allanullu nunatsinnut nassiussanut toqqorsisarneq. Aammattaaq soorunami umiarsuit amerlasuut Kalaallit Nunaata imartaanut tikittartut aallartartullu aqqutigineqartarput.
Royal Greenlandip kilisaataani Avataq-mi hashimik 21 kiilumik arsaarinnissuteqartoqarpoq, maannalu Royal Arctic Linep umiarsuaataa Tukuma Arctica hashimik eqqusseriarnermut atorneqarpoq.
Novembarimi 2022-mi hashimik 12 kiilut ataatilaarlugit oqimaassusilimmik umiarsuup sinaanut aalajangerneqarsimasoq nassaarineqartoq, politikommissæri misissuinermik aqutsisoq Malik Sandgreen uppernarsaavoq.
Sulimik misissuisoq
Tamatuma saniatigut politiit annerusumik oqaaseqarsinnaanngillat.
- Suliami tigusarisaqanngilagut, misissuisoqarneralu pissutigalugu politiit maannamut allanik paasissutissaateqanngillat, taanna nalunaaruteqarpoq.
RAL aamma suliaq pillugu annertuumik ilisimatitsissutissaqanngilaq. Taakku boksimik Tukuma Arcticami nassaarineqartumik ilanngaaserisunut tunniussipput, kisianni sumik imaqarneranik ilisimatinneqanngillat, taamaattumillu oqaaseqarsinnaanngillat.
2017-imi Polar Seafoodip kilisaataani Polar Nanoq-mi Islandimi Politiit hashimik 20 kiilumik nassaarput. Inuttaq tigusarineqarpoq, hashimillu eqqusseriartutut unnerluutigineqarluni.
Taamanikkut naalakkersuisoq Hans Enoksenip (N) umiarsuaatileqatigiiffiit kilisaatiminnit anngiortumik eqqussuinerit iluarsinngippatigit, siunissami aalisarsinnaanermut akuersissutinik tunniussisarnermut aamma pisassiisarnermut inatsisit Naalakkersuisut sukaternissaannik isumaliuteqarsinnaanerannik aarlerisaarivoq.