Hashimik eqqussuineq: Allamik toqusoqaqqissimasoq

Inuk alla ikiaroornartumik iiseriarluni anngiortumik eqqusseriartoq aamma toqukkut qimagussimavoq, taamaalilluni 2022-mi inuit pingasut ikiaroornartumik isisimanerminnik toqquteqarput. Matumunna angut 53-inik ukiulik hashimik iiseriarluni anngiortumik eqqussiniarsimasoq toqukkut qimagussimalluni.

Anngiortumik eqqussuisarneq ulorianartuuvoq. Pingaartumik ikiaroornartumik iiseriarluni anngiortumik eqqussiniarneq ulorianarluinnartuulluni. Tamannalumi inuup ataatsip inuuneranik naleqarpoq. Politiinit tusagassiorfitsigut nalunaaruteqarnermi ilisimatitsissutigineqarpoq, angut 53-inik ukiulik Qaqortumi oktobarip 20-ani toqukkut qimagussimasoq.

- Angutip timaanik misissuinerup takutippaa, angut hashinik poortukkanik iisisimasoq, iisaasalu puuisa inalugaani katersuussimanerisa malitsigisaannik aseruunneqalersimanera toqussutaasimasoq, Kalaallit Nunaanni Politiit ilisimatitsipput.

Junimiilli pingajussaanik toqussutaavoq.

- Inuup allap ikiaroornartumik anngiortumik eqqussisimanini toqussutigimmagu assut alianarpoq. Ukioq mannaannaq inuit pingasut taamatut toqussuteqarput, amerlanerujartuinnartullu inuunertik taamatut ulorianartorsiortillugu eqqussiniartarnerat assut ernumanarluni, politikommissæri Malik Sandgreen Kalaallit Nunaanni Politiitni misissuisartut pisortaat oqarpoq.

Periuserineqartartoq mianersoqqutigiuassagaat

Taassuma erseqqissaassutigaa, anngiortumik eqqussuisoqartarnera unitsinniarlugu politiit akitsuuserisunik suleqateqarlutik suliaqartuartut, tamatumalu inuunermik naleqarsinnaanera mianersoqqutigiuarneqartassasoq oqaatigalugu.

Poortukkat suugaluartulluunniit naamut inalukkanulluunniit nippussinnaapput. Kokaini ikiaroornartulluunniit allat puuisa putunerisigut ikiaroornartumik ingasaassilluni timimiittoqalersarpoq.

Pisumi matuani inalukkanut katersuuttoqarsimavoq, tamatumalu kinguneranik inuunermik naleqartumik aseruunneqartoqalersimalluni.

2022-mi inuit katillugit 45-t ikiaroornartumik iisisimallutik anngiortumik eqqussisimasut paasineqarsimapput. 2021-mi inuit 14-it taamaaliorsimallutik. Taamatut eqqussisimasut taamaalillutik 220 procentimik amerleriarsimapput.

Powered by Labrador CMS