Hashimik eqqussuineq pillugu suliami annertuumi sakkortuumik pineqaatissiisoqartoq

Inuk ataaseq ikiaroornartumik hashimik 10 kiilumit annertunerusumik anngiortumik eqqussisimasutut pineqaatissinneqarpoq, ukiunilu pingasuni pinerluuteqarsimasunut inissiisarfiimmiittussanngorlugu 575.000 kr-inillu arsaarneqartussanngorlugu pineqaatissinneqarpoq.

Allat marluk poortukkanik ikiaroornartumik hashimik 5 kiilup missaani annertussuseqartunik imaqartunik tigusinermikkut eqqussueqataasimasutut pineqaatissinneqarput. Taakku tamarmik eqqartuusivimmi sakkukitsumik pineqaatissinneqaraluartut, nunatta eqqartuussiviani ukiumi ataatsimi pineqaatissinneqartunut inissiisarfimmiittusanngorlugit, aningaasanillu arsaarneqartussanngorlugit eqqartuunneqartut, unnerluussisuuneq Zara Illum Petersen tusagassiutinut nalunaarummi allappoq.

Inuit arfineq marluk allat siorna pineqaatissinneqarput, qanittumilu pineqaatissiinerit pingasut pisut ingerlateqqitaapput, taamaammallu nunatta eqqartuussivia akulerunneqarpoq.

Suliami matumani annertuumi inuit katillugit aqqaneq marluk pineqaatissinneqarlutilluunniit akiliisussanngortinneqartut, unnerluussisuuneq nalunaarpoq.

- Nunatta eqqartuussiviata sakkortunerusumik pineqaatissiinera nuannaarutigaarput, taamaaliornikkummi arlaannilluunniit iliuuseqartuugaluaraanni hashilerinerup qanoq sakkortutigisumik isigineqarnera takutinneqarpoq. Poortukkanilluunniit hashimik imaqartunik tigusisuuinnaraluaraanni, taakkuninngalu ingerlatitseqqiinnarluni, taamaaliorneq suli anngiortumik eqqussuinerup ilagaa annertooq, taamaammallu tamanna aamma pineqaatissiinermik sakkortuumik kinguneqartinneqarpoq. Suliami uani sivisuumik pinerluuteqarsimasut inissiisarfianniittussanngortitsinerup anngiortumik ikiaroornartumik hashimik eqqussuinerup tamanit ilungersunartutut isigineqarnera ersersippaa, unnerluussisuuneq Zara Petersen Kalaallit Nunaanni Politiinit nunatta eqqartuussiviani unnerluussisuusoq oqarpoq.