atornerluineq
Hashimik atornerluineq pillugu atuakkap angajoqqaat ikiussavaat
Angajoqqaanut hashimik pujortartartunik inuusuttuutilinnut imminut ikiornissamut atuakkiaq kalaallisuunngortinneqarpoq
Atuagaq imminut ikiornissamut tunngasoq, ”Hashimik pujortartartumik qitornalimmut” maanna kalaallisuunngorlugu nutserneqarsimalerpoq.
Atuagaq Christopher Schmitzimit allanneqartoq, meeqqat hashimik pujortartarpata, imaluunniit angajoqqaat pasitsaassaqarunik, angajoqqaanut siunnersuutinik imaqarpoq.
Peqqissutsimut Naalakkersuisoqarfik Christopher Schmitz aamma atuakkiorfik èdito suleqatigalugit atuagaq kalaallisut nutsertippaat.
- Hashi inuiaqatitsinni ajornartorsiutaavoq annertooq annertusiartortorlu. Hashimik atuineq ernumanartumik annertusiartortoq takuarput, pingaartumik angutini inuusuttuaqqani. Taamaattumik nuannaarutigaara maanna angajoqqaat suliamullu tunngasumik suliaqartut inuusuttut hashimik atuinngitsoorsinnaajunnaarnerminik ikiorneqarnissaanut kalaallisut sakkussaasinnaasumik neqerooruteqarsinnaagatta, Peqqissutsimut Naalakkersuisoq, Agathe Fontain tusagassiuutinut nalunaarummi taama oqarpoq.
- Hashimik atuineq unitsinniarlugu inuiaqatigiittut ataatsimoortariaqarpugut. Amerlasuut hashi uloriananngitsutut isumaqarfigigaat paasivara. Kisinni ilisimatusarnerup takutippaa ingammik inuusuttuaqqanut hashi pinngitsuuisinnaajunnaartitsisartoq ulorianaateqartorlu. Hashi pillugu oqallikkaangatta aamma meeqqavut hashi pillugu oqaloqatigigaangatsigit piviusut tunngavigisariaqarnerat pingaaruteqarluinnartoq tamanna siammarterusuppara.
Christopher Scmitzip suliffeqarfik Komphash pigaa, taanna hashimik pujortartartunut, ilaquttanut atuarfinnullu siunnersuisarpoq. Arlaleriarluni Nunatsinniinnikuuvoq.
- Atuagaq “Hashimik pujortartartumik qitornalimmut” kalaallisuunngortinneqarnissaanut Peqqissutsimut Naalakkersuisoqarfik suleqatiginissaanut aalajangersimavunga hashimik atornerluinermut katsorsarnermut misilittakkat pitsaasut avitseqatigiumallugit, taanna tusagassiuutinut nalunaarut naapertorlugu taama oqarpoq.
- Misissuinerup takutippaa inuusuttup hashimik atornerluijunnaavinnissaa anguniarlugu angajoqqaat peqataatinneqarnissaat pisariaqarluinnartoq.
Atuagaq ”Hashimik pujortartartumik qitornalimmut” peqqik.gl-imi aaneqarsinnaavoq.