Hashimik atornerluineq oqaloqatigiinnikkut akiorneqarniartoq
Qeqqata Kommunia qanittukkut Sisimiutni Maniitsumilu pikkorissartitsivoq, tassani pitsaasumik oqaloqatigeeriaatsit, inuusuttunik hashimik atornerluisunik oqaloqateqartarnermi atorsinnaasut, ilinniarnissaat sammineqarpoq.
Qeqqata Kommuniata pitsaasumik oqaloqatigeeriaatsit aqqtigalugit inuusuttut hashimik atornerluisarnerat akiorniarpaa.
Kommuni taamaammat Sisimiuni Maniitsumilu sapaatip akunnerini 47-mi 48-milu pikkorisaanermik aaqqissuussisimavoq. Tassani aamma pingaartillugu sammineqarsimavoq, angajoqqaat oqaloqatigiinnermut qanoq peqataatinneqarsinnaanerat, kommunimit tusagassiorfinnut nalunaarummi allassimavoq.
- Pikkorissaanerup siunertaraa, sulisut kommuunimilu akimortumik suleqatigiissitat inuusuttunik, angajoqqaanik kiisalu ilaqutariinnik sullissisut piginnaanngorsarnissaat, nalunaarummi allassimavoq.
Ataatsimoorullugit akisussaaffiit
Sullissisut kommuunimilu sulisut pingaarutillit, ulluinnarni inuusuttunik angajoqqaanillu sullissisut, aammalu suliffeqarfiit kommunip ataaniittut; nunaqarfinni sulisut, Peqqinnissaqarfiit, Kriminalforsorgi kiisalu atornerluisunik katsorsaasut, pikkorissaanermi peqataatinneqarput.
Borgmesterip Malik Berthelsenip eqqaavaa, taamatut pikkorissarneq suliuniutit ingerlaavartut ilagigaat, kommunimi peqqinnermut pitsanngoriaataasussaq.
- Peqqinneq pinaveersaartitsinerlu ataatsimoorullugit akisussaaffigaagut, ataatsimut kivitseqatigiinnissaq anguniarlugu suleqatigiinnissarput pisariaqarpoq. Uumap suliniutip pinaveersaartitsineq tapersersuinerlu aalluppai, kommuunimi oqartussat assigiinngitsut akimortumik suleqatigiinnerisa pitsanngorsarnerisigut pinerluttarneq hashimillu atornerluineq annikkillisinneqassapput, taanna tusagassiorfinnut nalunaaruteqarnermi oqarpoq.
Sakkussat
Atugarissaarnermut Immikkoortortami sullissisuusup Amalie Kleistip oqaatigaa, misigisimalluni piareersimanerulersimalluni sakkussaqalersimallunilu, qanoq iliorluni meeqqat inuusuttullu hashimik atornerluisut oqaloqatigisinnaanerinut.
- Siornatigut ilisimavallaanngilara qanoq inuusuttunut oqaloqatigiinnermik pitsaasumik ingerlatsisoqarsinnaanera. Nuannerpoq taamatut sakkussaqalerluni aammalu suut mianersuutassaanersut maluginiarnerulerlugu, Amalie Kleist oqarpoq.
Ilisimatitsissutigineqarpoq, Qeqqata kommuniani suliniutip "Inuunerissaarneq - Det gode liv" ataani suleqatigiissitaq "Siusinaartumik iliuuseqarneq" qulequtaralugu suliniueqartoq, Komphashimik piginnittoq aqutsisorlu Roskildemeersoq, Christopher Schmitz, suleqatigalugu pikkorissarnerit ingerlanneqarsimasut.