Angut 28-nik ukiulik Danmarkimeersoq, hashimik nunamut maanga 11,7 kiilumik anngiortumik eqqussisimasutut ukiut pingajuisa affaanni pineqaatissinneqarsimasunut inissiisarfimmiittussanngorlugu eqqartuunneqarpoq. 

Nunatta eqqartuussisuuneqarfiani isumaqatigiittoqarneratigut Qaasuitsumi Eqqartuussisoqarfiup pineqaatissiissutaa atuuttussanngortinneqarpoq. Suliassaq siorna novembarimi aallartinneqarpoq, taamani 28-nik ukiulik Nuummi Royal Arctic Linemut takkuppoq poortugarlu namminerminut nassiussaq tigujumallugu. Tamanna sioqqullugu RAL politiinit ilimasaarneqareersimavoq, qinnuigineqarlutillu poortukkat normuat aalajangersimasoq aaneqarpat politiit attaveqarfigissagaat. Taama pisoqarmat angut tigusariartorlugu politiit arlallit takkupput. 

Aviisi AG allappoq.

Angut 28-nik ukiulik pinngitsuunerarpoq, pinngitsuutitaanissanilu piumasaralugu. Pisuussuteqannginneranilli najukkami eqqartuussivik imaluunniit Nunatta Eqqartuussisuuneqarfia upperinninngillat. Aamma ikiaroornartunik pinerluuteqarneq inatsisinik unioqqutitsinertut ilungersunartutut isigineqarmat, eqqartuussivimmi suliarineqarnerani aningaasartuutit aamma akilertussanngorpai. Hashi 12 kiilungajak poortukkami qimminut nerukkaatissanik imalimmi nassaarineqarpoq, ilaatigut Dentastix-imik nalunaaqutalinni.    

Nuummi siorna hashi 67,2 kiilut arsaarinnissutigineqarput, taakku nuna tamakkerlugu arsaarinnissutigineqartut 129,6 kiilut ilagaat. 

Aviisimi AG-mi atuarnerusinnaavutit. Aviisi uani pissarsiariuk:

AG - 26/07-2023

Klik her for at læse