Hashi pillugu unnerluunneqartut qiimallutik eqqartuussivimmut iserput

Nunatta oqaluttuarisaanerani hashi pillugu suliat annersaasa ilaanni unnerluutigineqartut arfineq-marluk politiimit ataatsimit ingiaqatigineqarlutik Nuummi eqqartuussivimmut iserput. Ikinngutinut ilaquttanut eqitaarinnittoqarlunilu ilassiortoqarpoq.

Unnerluutigineqartut aliasuppasigatik aamma pisup ilumoorsaassusaanit sunnerteqqarpasinngillat, kisianni qungujunnissamut aamma akunnerminni piaarilarnissaminnut nukissaqarput.

Eqqartuussutit atuarneqareermata, aamma ataatsip ukiuni tallimani qaammatinilu qulingiluani pineqaatissinneqarnera allallu tallimat ukiuni tallimani pineqaatissinneqarnerat, kiisalu arnap ataatsip ukiuni pingasuni qaammatinilu qulingiluani pineqaatissinneqarneri eqqartuussisumit tunngavilersuutit atuarneqarmata tusarnaaqqissaartoqarpoq.

Eqqartuussisup pineqaatissiinermut tunngavilersuutit atuarmagit ileqimisaartortoqarpoq.

Qummuinnaq isigisoq

Ingammik tunuliaqutaasutut oqaatigineqartoq annerpaamik pineqaatissinneqartoq, nakuusertutut aamma sioorasaarisutut eqqartuussisoq tunngavilersuimmat tunniutiinnarpasittutut illuni ileqimisaartorlunilu qungujoqattaarpoq.

Ilaqutaasut aamma ikinngutit ukioq ataaseq tigummigallaanerup kingorna, eqqarsarnerisa nalaanni eqqartuussiviup qimannissaanut qilanaarsimarpasikkaluartut qularutissaanngilaq.

Najuuttut akornanni anersaarulunnerit

Najuuttut akornanni anersaaruluttoqarpoq, arnap unnerluutigineqartup suli tigummigallarneqarnissani eqqartuussummi oqaatigineqarmat niaqquni tiguaa.

Tigummigallarneqarnerisa attatiinnarnissaat unnerluussisup piumasaraa, taamaalillutik suliaq Nunatta Eqqartuussisuuneqarfianut ingerlateqqinneqassappat, ilisimannittuusinnaasut sunnerneqannginniassammata.

- Nunatta Eqqartuussisuuneqarfianit aalajangiinermut eqqartuussivik allannguisinnaanngilaq, eqqartuussisoq unnerluutigineqartunut seqinnarimmut aninissaminnut periarfissamik takusimagaluartunut taama naqissusiivoq.

Pulaarnermi nakkutiginninneq atorunnaarsinneqartoq

Kisianni pulaarnermi aamma allakkat misissorneqartarnerat atorunnaarsinneqarpoq.

Powered by Labrador CMS