Hashi pillugu suliaq: Unnerluussamut pingaarnermut eqqartuussut sivitsuutaasoq

Unnerluussisoq hashi pillugu suliami sakkortuumik pillaateqartoqarnissaanik piumasaqarpoq. Unnerluunneqartup pingaarnerup nakorsat eqqartuussinermi siunnersortaasartut nalunaarutaat utaqqivaa.

Walter Turnowsky

ataasinng 25. juu 2018 09:38

Annonse

Unnerluussisussaatitaasup inuk tunuliaqutaasutut oqaatigisaat eqqartuussiviup pisuutippagu, taava taassumunnga eqqartuussiviup pineqaatissiissutaata qanoq innissaanik aalajangiisoqarnissaanut piffissaq suli sivisuumik ingerlaqqaassaaq. Nakorsateqqartuussinermi siunnersortaasartut nalunaarutaata utaqqineqarnera tassani tunuliaqutaavoq, taakku pineqaatissiissummut inassuteqassapput.

Hashi pillugu suliami unnerluussut

Hashi pillugu suliami unnerluussut pingaarneq pisunut pingasunut agguataarneqarpoq, taakku piffinni assigiinngitsuni pingasuni pisimapput.

Pisoq 1: Allagaq unnerluussut naapertorlugu 7. juuli 2015-ip aamma 6. novembar 2015-ip akornanni pisimavoq. Taakku tassani Danmarkimi Nunatsinnut hashimik 6,8 kiilumik eqqussisimanerarneqarput. Taakku poortukkan arfinilinni nassiunneqarsimanerarneqarput, unnerluutigineqartut marluk Nuummi allakkerivimmi tigusimavaat. Unnerluussisussaatitaasup uppernarsaataani pingaarnerpaavoq poortukkani adressimut immersuiffiit allaffigineqarsimasut. Taakku ilimanaateqarluinnartumik unnerluutigineqartumut ataatsimut attuumassuteqartinneqarsinnaapput. Piffissamilu tassani aamma Danmarkimut aningaasanik nuussisoqartarsimavoq. Poortukkanik hashimik nassaartoqanngilaq.

Pisoq 2: Allagaq unnerluussut naapertorlugu 7. novembar 2015-ip aamma 31. decembar 2016-ip akornanni pivoq. Taakku tassani hashimik 27,6 kiilumik Nunatsinnut eqqussuisimanerarneqarput. Unnerluunneqartup ataatsip Danmarkimi kontunut marlunnut 966.000 koruunit nassiussimammagit unnerluussisussaatitaasup uppernarsaataani pingaarnersaapput. Aningaasat taakku Christianiami hashimik pisinermut atorneqarsimassangatinneqarput. Piffissami tassani poortukkanik nassaartoqanngilaq.

Pisoq 3: Allagaq unnerluussut naapertorlugu januuarip aallaqqaataata 2017-ip aamma 24. juli 2017-ip akornanni pisimanerarneqarpoq. Tassani unnerluutigineqartut hashimik 27,1 kiilumik poortukkanut arfineq-pingasunut agguakkanut Nunatsinnut nassiussisimapput. Poortukkat marluk 2 kiilunik aamma 5 kiilunik hashimik imaqartut akitsuuserisunit tiguneqarput. Unnerluutigineqartup ataatsip poortukkat adressemut apuutinnginnerini allakkerivimmi tigunissaat suliassaraa. Unnerluussisussaatitaasup tassani ilaatigut allattariaatsip sanilliunneqarneri, assaat ipai, aningaasanik nuussinerit, oqarasuaatikkut immiussinerit aamma videokkut immiussat uppernarsaatissarai.

Tamatuma saniatigut pisut arlallit ataatsip arlaqartulluunniit unnerluussuteqaatigaat.

Angut niaqulaartuunngitsoq imaluunniit qaratsamigut ajoqusersimanngitsoq sianissusaanik nalunaarutip suliarineqarsimasup naqissuserpaa. Taanna arlaleriarluni pineqaatissinneqartareerpoq, ingammik nakuusernini aamma sioorasaarinini pissutigalugit. Sianissusaanik nalunaarusiami ilaquttaminut aamma inuiaqatigiinnut artorsartitsisuusoq allaatigineqarpoq, kisianni nalunaarut naapertorlugu ima ulorianartiginngilaq killiligaanngitsumik paarnaarunneqarnissaminut.

Pissuussummut apeqqut aalajangiisuussaaq

Nakorsat eqqartuussinermi siunnersortaasartut nalunaarut taanna misissussavaat, taannalu tunuliaqutigalugu pineqaatissiinissamut inassuteqassapput.

Eqqartuussiviup sapaatip-akunnera ataaseq marlulluunniit qaangiuppata eqqartuussutini aalajangiuppagu, tunuliaqutaasup unnerluussutini qanoq annertutigisumik pisuussuteqarneranut kisiat aalajangiissaaq. Pisuutinneqassappat eqqartuussinissamut nutaamut aggersaasoqassaaq, tassani pineqaatissinneqarneranut apeqqut suliarineqassalluni. Nakorsat eqqartuussinermi siunnersortaasartut angutip nalinginnaasumik pineqaatissinneqarnissaanik nalunaaruteqarpata, unnerluussisussaatitaasup Tobias Bergip ukiut tallimat sinnerlugit pineqaatissinneqarsimasut inissiisarfiannut inissinneqarnissaanik piumasaqarnissani oqaatigereerpaa.

Ukiut tallimat ataannagit piumasaqartoq

Sinnerinut aamma sakkortuumik pineqaatissiinissamik piumasaqarpoq. Unnerluutigineqartunut tallimanut ukiut tallimat ataannagit paarnaarussaanissaannik piumasaqarpoq.

Kingulleq arnaq inuusuttoq anngiortumik eqqussuinermi 2017-imi pisumi kisimi unnerluutigineqarpoq. Tassunga tunngatillugu unnerluussisussaatitaasoq ukiuni pingasuni qaammatinilu qulingiluani paarnaarussaanissaanik piumasaqarpoq.

Unnerluutigineqartut tamarmik pinngitsuunerarput. Eqqartuussiviup eqqartuussuteqarfigissappagit, illersuisut pineqaatissiissutinik sivikinnerujussuarmik piumaqasaqarput. Tassami unnerluussisussaatitaasoq 2017 sioqqullugu anngiorluni eqqussuinermut tunngatillugu uppernarsaatinik amigaateqartoq isumaqaramik (paasissutissat takukkit).

Aammattaaq 2017-imi haship 27,1 kiilup eqqussorneqarsimaneranik unnerluussisussaatitaasup naatsorsuineri akuerinngilaat.