Hashi pillugu suliaq: Unnerluunneqartup nakuuserneq filmiliarigaa
Nakuuserneq aamma toqutsinissamik sioorasaarinerit hashi pillugu suliami unnerluussissutit ilagaat, taanna maani suliat annersaasa ilaattut oqaatigineqarpoq.
Inunnut arfineq-marlunnut unnerluutigineqartunut allagaq unnerluussut naapertorlugu, pisunit 21-iusunit pingasut hashimik anngiortumik eqqussuinermut tunngapput, tamatuma hashimik eqqussuisut millioninik marlunnik kisitsisitalinnik iluanaaruteqartissimavai.
Pisut sinnerisa avatangiisit sakkortuut pineqarnerinik takutitsipput, unnerluussut naapertorlugu nakuuserneq aamma sioorasaarinerit avatangiisinut ilaapput.
Nakuuserneq filmiliarineqartoq
Ingammik maajip 19-anni Lyngby-Taarbækvejimi, Nuummi Blok 16-imi biilit uninngasarfianni nakuuserneq immikkut maluginiagassaavoq. Tassani inuk niaqqumigut annersarneqarpoq, timikkut tilluarneqarluni. Taanna pisuussuteqanngitsoq saassunneqarnerani unnerluunneqartut ilaata pisoq tamaat mobiliminik filmiliaraa.
Inuk alla juulip 22-anni Nuussuarmi ulloqeqqaanerani saassunneqarpoq, niaqqumigullu arlaleriarluni tilluarneqarluni. Saassunneqartoq uppippoq, niaqqumigullu annersarneqaannarluni. Tamatuma kingorna pineqartoq naami nalaatigut tukertarneqarpoq, kingornalu ilisimajunnaarpoq. Ulussami saarnatigut napivoq, napparsimmavimmilu uninngasariaqarluni.
Saassunneqarsimasoq aqaguani oqarasuaatikkut attaveqarfigineqarpoq sioorasaarneqarlunilu:
- Pulaaqqissavakkit?, allagaq unnerluussut naapertorlugu taama sioorasaarisoqarpoq. Taannalu pineqartoq ima sioorasaarneqarpoq:
- Politiinut sianeruit taamaalioqqeriarlutit imaanut iginneqarsinnaavutit.
Arnat unatarneqarnissamik sioorasaarneqartut
Arnat aamma sakkortuumik sioorasaarneqarsimasut, allakkami unnerluussummi atuarneqarsinnaavoq. Januaarip 20-anni Nuummi H. J. Rinskvejimi Blok 9-p aamma 10-p akornanni ima sioorasaarisoqarpoq:
- Tamassi sequtsissavassi, ilumoorpunga.
- Arnaagaluarussiluunniit tamassi unatassavassi.
Pisut ilaanni unnerluutigineqartut pineqaatissinneqarsimasut inissiisarfianniinnerisa nalaanni angerlarsimaffiini hashimik nassaartoqarneranut tunngapput. Politiinut aamma sioorasaarisoqarsimavoq.
Unnerluutigineqartunut arfineq-marlunnut eqqartuussineq Sermersuup Eqqartuussiviani Nuummi apriilip 16-anni pissaaq.