Hashi pillugu oqallinneq: Inerteqqutaajunnaarsitsinerup inuiaqatigiit suli naligiinnginnerulersissavai?

Hashimik anngiortumik eqqussuineq Kalaallit Nunaanni Politiini inituneruleriartuinnarpoq. Ukiuni kingullerni iioraallutik eqqusseriartut Kangerlussuarmi tigusarineqartartut amerlapput, sapaatip-akunneratalu siuliani Sermitsiaq.AG-p oqaluttuaraa, RAL-ip umiarsuaata sinaani Danmarkimeersumit ilanngaaserisut hashimik 12 kiilumik novembarimi nassaarsimasut.

Eqqussuineq pillugu allaaserisarpassuit Atassummi siulittaasoq Aqqalu Jerimiassen sapaatip akunnerani kingullermi Facebookikkut allagaqarneranik kinguneqarpoq, tassanilu nunatsinni haship inerteqqutaajunnaarsinnissaa pillugu oqallittoqarnissaanut kaammattuivoq.

Allorfimmi Pinngitsuuisinnaajunnaarneq pillugu ilisimasaqarfimmi inuit hashimik pinngitsuuisinnaajunnaartut, ikiaroornartullu kingunerinik pitsaanngitsunik nalaataqartut katsorsarneqartarput.

Haship inerteqqutaajunnaarnissaa pillugu apeqqut politikkikkut suliassaasoq, nakorsaq siunnersuisuuneq, Birgit Niclasen oqarpoq, hashi inerteqqutaajunnaassappat, atornerluinerup qanoq ineriartornera maluginiartariaqarpoq.

Atornerluineq equngasumik eqquisarpoq

Atornerluineq inuiaqatigiinni sakkussakereersunik amerlanerusunik eqquisareerneranik tamanna pissuteqarpoq:

- Haship inerteqqutaajunnaarnissaa kissaatigineqarpat, taava kinguneri inuiaqatigiinni equnganerulersitsinnginnissaat inuiaqatigiittut annertuumik eqqumaffigisariaqarparput, Birgit Niclasen allagaqarluni taama akissuteqarpoq.

Taanna ilaatigut 2018-imi Innuttaasut misissorneqarnerannut innersuussivoq, tassanilu Kalaallit Nunaanni inuuniarnikkut naligiinnginneq annertoorujussuusoq takutinneqarpoq.

Nunap immikkoortuini assigiinngitsut akornanni, illoqarfiit nunaqarfiillu akornanni, inuit eqimattat akornanni, aamma oqaatsitigut eqimattat akornanni, inuuniarnikkut sulinikkullu atukkat, ineqarnerup pitsaassusaatigut, ilinniakkap qaffasissusaatigut assigiinngissuteqartorujussuusut misissuinermi inerniliunneqarpoq.

Politiit pisortaat: Hashi isumaginninnermik suliassaqarfimmut sunniuteqartorujussuuvoq

Hashi inunnik isumaginninnermik suliassaqarfimmi aamma sunniuteqartorujussuusartoq, Kalaallit Nunaanni Politiit misigisarpaat, politiit angerlarsimaffinnut eqqissiviilliortunut imaluunniit isumaginninnikkut suliani allani hashi naammattoortarmassuk.

Nunatsinni haship atugaanerata kinguneri pillugit politiit pisortaata apersorneqarnerminut atatillugu ilisimatitsissutiginikuuaa.

- Inunnik isumaginninnermik suliaqarfimmut haship sunniuteqartorujussuusarnera misigisarparput. Hashimik atornerluineq pissutigalugu meeqqat sumiginnagaasut nalaattarpavut. Meeqqat inuusuttut, inersimasullu hashimik ajornartorsiuteqarnertik pissutigalugu atuarfimmi suliffimmi ajornartorsiortut takusarpagut.

- Tamanna tunuliaqutigalugu politeerpassuit aamma tassunga atortarpavut, nunatsinni inuuniarnikkut unammilligassanut annertuumik sunniuteqarnera pissutigalugu, hashimik atornerluineq annertummat, politiit pisortaat apersorneqarnermini taama oqarpoq, taannali haship inerteqqutaajunnaarnissaa imaluunniit inatsimmik sukaterinissamut oqallinnermut attuumassuteqanngilaq.

Akuleriinnik atornerluisoqarajuttoq

Akuleriissillugu atornerluisoqarajuttartoq, siornatigut misissuinermi takutinneqarsimasoq pillugu, Birgit Niclasen Allorfimmeersoq ajornartorsiummik allamik erseqqissaavoq, tassani imigassaq aamma aningaasanoorajunneq ilaasinnaasarpoq, atornerluinerlu arlaatigut assut atugaasartoq:

- Inoqutigiinni 18-it inorlugit ukiulinnik meerartalinni ilaqutariit 44 procentii ataatsimik arlalinnilluunniit atornerluisuusarput.

Allorfiup ukiumoortumik nalunaarutaani aanngajaarniutit ataqatigiittartut takutinneqarpoq. 2021-mi makkuninnga peqarpoq:

Imigassamik ajornartorsiuteqartut 30 procentii aamma hashimik ajornartorsiuteqarput

Hashimik ajornartorsiuteqartut 80 procentii aamma imigassamik ajornartorsiuteqarput

Aningasanoorajunnermik ajornartorsiuteqartut 18 procentii aamma hashimik ajornartorsiuteqarput