Hashi kilorpassuarnik oqimaassusilik kingoraartissat ataannut toqqorneqarsimasoq
Angut ataaseq anngiortumik hashimik eqqussisimasutut pisuutinneqarami ukiuni sisamani pineqaatissineqarsimasut inissiisarfianniittussanngorpoq.
Angut 30-ikkunnik ukiulik hashimik 29,06 kiiluusumik Danmarkimiit Kalaallit Nunaannut anngiortumik eqqussisimasutut Sermersuup Eqqartuussiviani marlunngormat ukiuni sisamani pineqaatissinneqarsimasut inissiisarfianiittussanngorlugu eqqartuunneqarpoq.
Politiit naapertorlugit, anngiortumik eqqussinermi kingoraartissat pallemiitillugit angutip suliffeqarfianut ukioq manna martsip qaamataani nassiunneqarsimapput. Politiit tusagassiorfinnut nalunaaruteqarnermi ilisimatitsipput.
Palleli kingoraartissanik imalik akitsuuserisunit unitsinneqarsimavoq, taakku pallep naqqa allaasoq maluginiarsimavaat. Tamanna malugineqarmat politiit aggersarneqarsimapput, politiillu pallemi hashi 298-inut aggorneqarsimasoq - katillugit 29 kilomik oqimaassusillit nassaarisimavaat.
Hashi miliuuninik marlunnik kisitsisitalinnik nalilik
Politiit nalilersimavaat, hashi arsaarinnissutaasoq Kalaallit Nunaanni miliuuninik marlunnik kisitsisitalinnik naleqassasoq.
Haship nassaarineqarneranut atatillugu angut tigusarineqarsimavoq, eqqartuussisoqarnissaatalu tungaanut tigummigallarneqarsimalluni, najukkami eqqartuussivik marlunngormat eqqartuussivoq. Angutip anngiortumik eqqussisimanini nassuerutigaa, allanilli oqaaseqarumanani.
Politiit pineqaatissiissutaasoq naammagisimaarpaat:
Pineqaatissiissut akuerigaa
- Unnerluussisussaatitaasut innersuussutaannik eqqartuussiviup malinnissimanera naammagisimaarpara – tassa pisuussuteqarnermut pineqaatissiissutissallu sivisussusissaanut tunngatillugit innersuussutit malinneqarsimapput. Pineqaatissiinerup takutippaa, Kalaallit Nunaanni hashimut atatillugu aaqqissuussaasumik pinerluuteqartartunut siuttuunngikkaluaraanniluunniit sakkortuumik pineqaatissiisoqarsinnaavoq, suliaamut atatillugu unnerluussisutut eqqartuussivimmi najuuttoq politeeq Anders Næstholdt oqarpoq, nangillunilu:
- Suliami inerniliunneqartoq aamma Kalaallit Nunaanni politiit akitsuuserisullu suleqatigiilluartarnerannut takussutissaavoq, taakku suliami matumani suliaqarsimanera nersugassaavoq.
Politiit naapertorlugit eqqartuussivimmit pingaartinneqarsimapput haship annertussusaa angutillu aaqqissuussaasumik pinerluuteqartarnermut attuumassuteqarnera. Angutip eqqartuussut akuerisimavaa.