Qinersinermi ataatsimiititaliaq
Hardenbergip qinersinermi ataatsimiititaliaq qaaqqusinnaavaa
Hardenbergip qinersinermi siulersuisut inassuteqarnissaat utaqqivaa, IA-p qinersinissamut qinigassanngortitaasa allattorsimaffiata tunniunneqarnerani ajornartorsiuteqarnersoq nalilernissaanut
Tallimanngormat nalunaaqutaq 12 qularnartoqartinneqarsimavoq IA-p qinigassanngortitami allattorsimaffia piffissaq eqqorlugu malittarisassallu malillugit tunniussimaneraa.
Qinigassanngortittut allattorsimaffiat tunniunneqarpoq atsiorneqarsimanani, pissutigalugu Sermersuup Kommuniani sulisup IA-kunnut nalunaarutigisimammagu partiip siulittaasuata Sara Olsvigip kisimi pappiaqqat tunniunneqartussat atsiorsinnaagai, tassa aaqqissuussaanikkut siulittaasup tulliata Juliane Henningseniunngitsup. Partiip siulittaasua Paamiuniissimavoq qinersisartunik ataatsimiititsinermi peqataalluni.
Sermersuumi qinersinermi siulersuisut borgmester siuttuliullugu IA-rmiut kukkusumik nalunaarfigineqarsimanerat ajuusaarutigaat, kommunilu kukkunermut imminut akisussaatippoq. Qinersinermi siulersuisut suliassaq Qinersinermi Ataatsimiititaliamut ingerlateqqippaa inassutigalugu IA-p qinigassanngortitanut allattorsimaffik piffissaq eqqorlugu tunniussimagaa. Qinersinermut Ataatsimiititaliap siulittaasua tassaavoq namminersorlutik oqartussani naalakkersuisoqarfimmi qullersaanerpaaq Svend Hardenberg.
Taannaa tallimanngormat ualikkut Sermitsiaq.AG-mut oqarpoq: – Uppernarsarsinnaavara Qinersinermi ataatsimiititaliami siulittaasutut ualeq manna kingusissukkut paasitinneqarsimagama suliassaq pissutigalugu Qinersinermi Ataatsimiititaliaq qaaqqusariaqarsinnaagiga.
Qinersinermi Ataatsimiititaliamut ilaasortaapput Svend Hardenbergip saniatigut Kanukokap pisortaa Hans Peder B. Christensen aamma biskop Sofie Petersen.