Aqqit
Hardenbergip atorfinitsitaanera qanigisamik pingaartitsinerunngilaq
Siulittaasup Naalakkersuisoqarfiata eqqunnginnerarpaa ilaqutariit aqqat Hardenberg, Saammaateqatigiinnermut Kommissionip allattoqarfiani pisortamik nutaamik, Mari Hardenbergimik, atorfinitsitsinermi tunngavissaatinneqarsimasoq
Atorfinirtsitsinermut Ataatsimiititaliamik anginerusumik pilersitsisoqarpoq paasineqarmat Mari Hardenbergi saammaateqatigiinnermut kommissionip allattoqarfiani pisortatut atorfimmut qinnuteqarniartoq.
Mari Hardenbergip Svend Hardenbergip qatanngutaa uiginikuuvaa Svend Hardenbergillu nulia qatanngutigalugu. Tamatuma saniatigut Mari Hardenbergip Naalakkersuisunut ilaasortaq Nick Nielsen aapparinikuusimavaa.
Mari Hardenbergip siuliani taaneqartutut attuumassuteqarnera pissutigalugu ilaat qisuariarsimapput oqamisaarlutik qanigisamik pingaartitsinerusoq.
Siulittaasulli Naalakkersuisoqarfiani pisortap Mininnguaq Kleistip taamaannginnerarpaa.
– Qanigisamik pingaartitsinertut isigineqarsinnaanera maani arajutsisimanngilarput. Paasigatsigu Mari Hardenberg atorfimmut qinnuteqassamaartoq atorfinitsitsinermut ataatsimiitaliami ilaasortat marlunniit sisamanut amerlineqarput uanga siulittaasuullunga, Mininnguaq Kleist Sermitsiaq.AG-mut oqarpoq.
Siulittaasup Naalakkersuisoqarfiani pisortap oqaatigisinnaanngilaa kikkut atorfinitsitsinermut ataatsimiititaliami ilaasortaanersut. Oqarporli ilaasortat tassaasut aqutsisutut allattoqarfimmeersut, inatsisinut immikkoortoqarfimmeersut aamma nunanut allanut tunngasunut pisortaqarfimmeersut.
Piginnaasat pingaartinneqarput
Mininnguaq Kleist oqaluttuarpoq Mari Hardenberg atorfimmut eqqortuusoq.
– Qinnuteqartut ilinniagaqarfiini ilinniagaqarfiit qaffasinnerpaat marluk Mari Hardenbergip ilinniagaqarfigisimavai. Qinnuteqartut allat taassumatut qaffasitsigisunik ilinniagaqarsimanngillat, Mininnguaq Kleist oqarpoq. Aamma saammaateqatigiinnermik ingerlatsineq qinnuteqartuni ilisimasaqarfiginersaavaa.
Mari Hardenberg, aamma ilinniartitsisutut ilinniagaqarsimaoq, Ilisimatusarfimmit bachelor-itut soraarummeersimavoq, Canadami Memorial University of Newfoundland-imit kandidatgrad-eqzrluni, aammalu Københavns Universitetimit forhistorisk arkæologi-mi ph.d.-tut grad-eqarluni.
Mininnguaq Kleist naapertorlugu Naalakkersuisoqarfimmi pisortaq Svend Hardenberg, Mari Hardenbergip saammaateqatigiinnermut kommissionip allattoqarfiani pisortatut atorfinitsitaanerani sunniuteqarsimanngilaq.
– Atorfinitsitsinermut Ataatsimiititaliami, Mari Hardenbergimik atorfinitsitsisumi siulittaasuusimavunga, aamma atorfinitsitsinermi pisortaagama. Svend Hardenberg atorfinitsitsinermut attuumassuteqarsimanngilaq, sulisoq tassunga attuumassuteqanngimmat, Mininnguaq Kleist erseqqissaavoq.
Mininnguaq Kleistip ilanngullugu oqaatigaa Svend Hardenberg oqarfigisimallugu Naalakkersuisoqarfimmi pisorttaq atorfinitsitsinermut attuumassuteqassanngitsoq.
Ilanngullugu oqaatigaa allaffimmi pisortanik nutaanik atorfinitsitsinermi nalinginnaasumik tusagassiorfinnut nalunaaruteqartoqarneq ajortoq,, Saammaateqatigiinnermulli Kommissioni innuttaasunit ima soqutigineqartigereermat atorfinitsitsinerup tamanut saqqummiunnissaa alajangiunneqarsimasoq.