Hardenberg KNI-mi siulittaasunngortoq
Svend Hardenberg Namminersorlutik Oqartussat ingerlatseqatigiiffiutaanni KNI A/S-imi kusanaatsuliorfiusimaqisumi, Lars Borris Pedersen tunuarniarluni aalajangermat siulittaasunngorpoq.
Ataatsimeersuartoqarnerani ilisimatitsissutigineqarpoq, Svend Hardenberg KNI A/S-ip siulersuisuini siulittaasunngortinneqartoq.
Svend Hardenberg Ilisimatusarfiup siulersuisuini aamma ilaasortaavoq, siusinnerusukkullu 2013-imiit 2015-imut Naalakkersuisut Siulittaasuata Naalakkersuisoqarfiani pisortaasimalluni. CVR-registeri naapertorlugu, Svend Hardenberg ingerlatseqatigiiffinnut arlalinnut attuumassuteqarpoq, ilaatigullu Kaffivimmi kaffinik tuniniaanissamik siunertaqartumi pisortaalluni. Aamma takornariartitsinerup imermillu avammut tuniniaasarnerup iluini suliaqartarsimavoq.
KNI-p siulersuisuini ilaasortaq alla, Søren Jakobsen siulersuisuni ilaasortatut tunuarniarluni aalajangersimavoq, taannalu taarserlugu Michael Skourup ilaasortanngorluni, ataatsimeersuarnermi ilisimatitsissutigineqarpoq.
Ullumikkut siulersuisuusut ukuupput:
Svend Hardenberg (Siulittaasoq)
Lone Møller Olsen
Annette Sadolin
Søren Hald Møller
Najaaraq Christiansen
Michael Skourup
Deloitte aamma avataanit kukkunersiuisartutut atorunnaarsinneqarpoq. Namminersorlutik Oqartussat tassunga taarsiullugu PwC, arlaannaannulluunniit attuumassuteqarani misissuisimasoq kukkunersiuisartunngortippaat.