kammerateri
Hardenberg kasiiligaavoq - taavali Aleqa akuleruppoq
Mamianartuliornerit, ingasaassinerit, taarsersuinerit. Naalakkersuisooqatigiinnut pasilliinerit imaaginnavipput. Tamanna tusaamanerlutsitsivoq. Siumup kammalaatilersornini nangippaa
Kalaallit Nunaat ikinngutinik ikiuinermik kammalaatilersornermillu sivisuumik atugaqarsimavoq. Maanna tamakkua nangeqqipput. Naalakkersuisuni nuimasuumik atorfillit oqarput politikkikkut tunngavilimmik atorfinitsitsisoqartartoq, ikinngutinik ikiuisoqartoq eqqumiitsulinillu soraarsitsisoqartartoq.
Tamanna oqaluttuarineqarpoq Berlingskemi allaaserisakkut, tassanilu Naalakkersuisut siulittaasuata Aleqa Hammondip, Siumut, saassussinerpassuit pasilliinerpassuillu oqaaseqarfigiumanngilai. Nipangersimaannarpoq.
Namminersorlutillu Oqartussani ingerlatsivissuarniluunniit angisuuni isorinnittut sassarumanngillat. Oqaaseqarnissaq ulorianarpallaaqaaq, paasisaqarfik Berlingskemut oqaluttuarpoq, tamanna amerlasuut atorfimminnik annaasaqarnerannik kinguneqarsinnaammat.
– Kikkut tamarmik maanna mianersorput, alla oqarpoq.
Svend Hardenberg
Berlingskep ilaatigut atorfilinnik soraarsitsiortornerit eqqaavai, isumaqarlunilu soraarsitsiortornerit pissutigalugit atorfillit unittooqqasut.
Assersuutigalugu Svend Hardenbergip Aleqa Hammondip naalakkersuisoqarfiani pisortatut atorfinitsitaanera eqqaavaa. Taanna siullermik kasiiligaasima oq, Aleqa Hammondili akulerummat atorfinitsinneqarpoq.
Aamma atuaruk: Taamaattumik Svend Hardenberg Nukissiorfinnit tunuarpoq
Kingullermik Carsten Frank Hansenip taarserneqarnerata kingorna naalakkersuisoqarfinni pisortat arfineq-pingasut affaat soraarsinneqarsimapput, namminneq soraarniuteqarsimapput imaluunniit soraarnerussutisiaqartinneqarlutik tunuartinneqarsimapput. Arlallit aamma namminersorlutik oqartussanit soraarsimapput Siumup nutaamik aqutseriaasia nuannarinagu.
Piffissami matumani namminersorlutik oqartussani atorfillit oqaluuserisaat paasisinnaalluarlugu nunat allamiut aningaasaliisinnaasut, tassa aningaaseriviit soraarnerussutisilaqalernissamullu aningaasaateqarfiit, Kalaallit Nunaanni aningaasaliinissaminnut annilaangalerpata. Atorfilinnut tamaviaarnarpoq attaveqarnermi suliniutinut, soorlu umiarsualiviliornernut mittarfiliornernullu aammalu aatsitassarsiornermut, aningaasaliisussanik nassaarniarnissaq.
– Kalaallit Nunaannit oqaluttuat nuanniitsut amerlavallaalerpata tamanna tatiginassutsimik eqquissaaq. Killissaalu tikilereerparput, kinaassutsiminik isertuussisoq Berlingskemut oqarpoq.
Allaaserisaq tamaat atuaruk uani
Carsten Frank Hansen pillugu mamianartuliamik allaaserisat tamaasa atuakkit