Hardenberg: Aalajangiinermi aaqqiagiinngittoqarpoq

Naalakkersuisut siulittaasoqarfianni pisortap Svend Hardenbergip nittartakkami 'Pisortaaneq nutaaq assortuussutigaat' atuaramiuk atuakkani paasiuminaatsippaa.

Tassani Aviâja Helmsip Kalaallit Nunaata Københavnimi sinniisoqarfiani pisortatut atorfinitsinneqarnera sammineqarpoq.

Aviâja Helmsip atorfinitsinneqarneranut aalajangiisut isumaqatigiinngissimanerat allaaserineqarpoq.

Svend Hardenberg Sermitsiaq.AG-imut ima allappoq.

'Assortuuttoqarnikuunngilaq imaluunniit isumaqatigiinngitsoqartorujussuulluni. Aamma atorfinitsitsinermut ataatsimiititaliaq Naalakkersuisut Siulittaasuannut (imaluunniit Naalakkersuisuni ilaasortanut tamanut) inassuteqartussaanngilaq – aalajangerneq atorfinitsitsinermut ataatsimiititaliami aalajangerneqartussaavoq, Svend Hardenberg allappoq, nangillunilu:

- Aamma imaanngilaq, Aviâja Helmsip allaatigisaq naapertorlugu, atorfimmut piukkunnaateqanngitsoq – Aviâja Helms piukkunnaateqarpoq, taamaassimanngitsuuppat aalajangertoqarsimanavianngikkaluarpoq.

Tassa ataatsimut isigalugu tamanna pillugu aaqqiagiinngittoqarsimavoq.

Atorfiup ilusaa inissisimaneralu tunngavigalugit, atorfinitsitsinermut ataatsimiititaliap siulittaasua aalajangerneq pillugu Naalakkersuisunut ilisimatitsivoq. Ilisimatitsissut Naalakkersuisunit pingasunngornermi ulloq 20. august 2014 tusaatissatut tiguneqarpoq Svend Hardenberg nalunaarpoq.

- Amerlanerussuteqartut aalajangiisimanerat Aviaja Hemsimut atorfinititsinermut aalajangiisumasut Svend Hardenberg oqarpoq. Aalajangiisunili isumaqatigiinngittoqarsimanera ersarippoq, allaaserisamilu tamanna salliutinneqarluni allanneqarluni, tusagassiortoq Christian Schulz-Lorentzen oqarpoq.

Sermitsiaq.AG-ip Svend Hardenberg tamanna pillugu saaffigigaluarpaa kinguneqanngitsumik.