Hanne O'Reilly sanalukkallu

56-inik ukiulik Hanne O'Reilly marriortarpoq Fynimilu najukkamini kalaaliunerminut kinaassutsiminik sammisaqarniartarluni.

Hanne O’Reilly inuusuttuunermini marriortutut ilinniagaqarniarsimagaluarpoq. Pissutsilli arlallit, pingaartumik aningaasaqarniarneq, pissutaallutik ilinniagarerusutani iluatsissimanngilaa. Klinikassistentitut kingusinnerusukkullu kigutigissaasutut ilinniarnissaq siunissamut qulakkeerinninnerusimapput. Hanne O'Reillylu Odensemi klinikkimi maanna atorfeqarpoq.

- Iluatsissaqqaarpara assassukkama siunissami inuussutigilerumaarnissaat, Hanne O'Reilly oqaluttuarpoq. Hanne O'Reilly Faaborgimi najugaani pulaarparput. Illua 1845-mi sanaajuvoq. O'Reillymik naggateqaraanni, tupaallaatigineqarsinnaanngilaq Irlandimiumik katisimasuulluni oqaraanni.

Hanne O’Reilly assassornermik imminut ilinniartissimavoq. Nannut angisuut mikisullu, nannut puugutarsuarni qallortutullusooq ittut, aammali inuit kalaallit Afrikameersullu ilusilersukkat pissanganarluinnartut, Hanne O'Reillyp suliarisarpai.

Hanne O’Reilly Arsummi inunngorpoq marlunnilli ukioqarluni meeravissiartaarineqarluni.

- Marlunnik ukioqarlunga peruluutigisannik napparsimalerpunga. Rigshospitaliliaanneqarpunga. Peqqissingama Danmarkimi meeqqat angerlarsimaffiannut inissinneqarpunga. Isumaqartoqarsimavoq uannut pitsaanerpaasoq Danmarkimiiginnaruma. Fynimi ilaqutariinnit taamaasillunga meeravissiartaarineqarpunga. Fynimi illoqarfeeqqami najugaqarpugut, meeraaneralu toqqissisimanarluinnartuuvoq, Hanne O'Reilly oqaluttuarpoq.

Inunngorfini tikeraarsimanngilaa

Kuisinnermut allagartaani ateq Astrid Caroline Sofie Petrine Jacobsen allaqqavoq. Meeravissiartaarineqarneranili aqqa Hanne Astridimut allanngortinneqarsimavoq.

- Eqqaamasara siulleq tassaavoq sinittarfimmi siniffeeqqat. Eqqarsaatigisarpara immaqa meeqqat angerlarsimaffianiusimassasoq.

Hanne O’Reillyp nalunngittuaannarpaa Kalaallit Nunaanneerluni. Ukiut ingerlanerini suminngaanneerfini attaveqarfigerusuttarsimavaa. 20-lli qiteqqullugit ukioqarluni aatsaat attaveqarnialersimavoq.

- Kuisinnermut uppernarsaatiga Arsummut nassiuppara, taakkulu ilaquttannut attaveqarnissannut ikiorpaannga. Nuummut aallarpunga, ilaquttamalu ilai taavani takullugit. Arsuk suli tikeraarnikuunngilara. Taamaallunga tikikkumaarpara.

- Kalaallit Nunaannut tikilluni, inoqatillu isikkukkut assigilluinnarlugit assut nuannerpoq. Tamanna pisariaqartissimavara, Hanne O'Reilly nuannaarluni oqaluttuarpoq.

Kalaallit Nunaat eqqumiitsuliornermi inuunermilu ilaalluinnarpoq

Kalaaliuneq pingaartinneqarluinnarpoq. Aanaakkut assigi iikkami nivingapput. Orpiliami kalaallit erfalasui pinnersaatigineqarput. Faaborgimi qajartortartunut peqatigiiffeqarpoq Malimmik ateqartumik. Ilaasortat namminneq qaanniortarput atugassaminnik. Hanne O'Reilly tassani ilaasortaavoq, upernarnissaanullu qilanaalereerpoq qajartuaqqittalissagami. Kalaallisut oqaatsit Hanne O'Reillyp ilinniarniarsimagaluarpai, eqarilluinnalersimallugilli.

Hanne O'Reillyp eqqumiitsuliaani nannut ilisimaneqarluarput. Ukiualuit matuma siorna illumi naqqani pisiniarfeeraliorpoq, tassanilu sunngiffimmini eqqumiitsuliaminik tuniniaasarluni. Coronali takkummat pisiniarfiutaa matusariaqalersimavoq. Suliaali Københavnimi Tivolimi 1. augustimi aamma Odensemi Nordatlantisk Husip juullimut tuniniaanerani tuniniarneqartarput.

- Nannut suliarigaangakkit kalaaliunera malugilluartarpara. Kinaasutsigami peroriartorninni imaaliallaannaq tunniunneqarsinnaasimanngilaq, nammineerlunga kinaasutsiga tiguniarsareqqittariaqarsimavara.

Powered by Labrador CMS